Bütünqırım mitingi iştirakçileriniñ Ukrainada diktatura qurulmasına qarşı talapları

28 Yanvar 2014

Ukrainada diktatura qurulmasına qarşı Bütünqırım mitingi iştirakçileriniñ Qararı

Ukrainada qan tökülmesi ve diktatura qurulması toqtatılsın!

2014 senesi yanvar 16-da alınğan diktatorlıq qanunlar lâğuv etilsin!

Qırımtatar halqınıñ aqları ğayrıdan tiklenilsin!

Ukrainanıñ territorial bütünligi ve mustaqilligi saqlanıp qalsın!

Ukraina ve onıñ vatandaşları mustaqilliklerini ilân etkenden soñ eñ telükeli ve facialı künlerni yaşamaqtalar. Ukraina prezidenti ve ükümeti memleketniñ tışqı siyasiy yönelişini keskin deñiştirmesi ve yevrointegratsiyadan vazgeçmesi neticesinde qopqan siyasiy inqıraz artıq cemiyet ve akimiyet arasında açıq ve küç işletilgen qapa-qarşılıq basqıçına keçti.

Kiyevde ve Ukrainanıñ diger vilâyetlerinde yevromaydanlarnıñ faal iştirakçileri olğan millionlarnen Ukraina vatandaşlarınıñ eki aylıq nafile beklevlerini akimiyet körmemezlikke aldı. Cemiyetnen açıq ve musaviy dialog qurmaq yerine akimiyet insannıñ aqları ve serbestligi kibi temeliy aqlarına ücümge keçti, cümleden Ukraina Anayasasına zıt demokratik printsipler ve parlament protseduralarını bozup toplaşuvlar, söz ve matbuat serbestligini sıñırladı.

Kiyevde tınç toplantı iştirakçileri ve İçki işler nazirliginiñ quvetleri arasında çatışma aqibetinde qan töküldi, insanlar elâk oldı, yüzlernen insanlar qurşunnen yaralandılar. Memlekette zorbalıqnıñ şiddetleşmesi diktatura ve basqı qurulmasına alıp kelip, öz nevbetinde bu Ukraina ve onıñ milleti ve dininden qatiy nazar sakinleri içün felâket olur.

Cemiyet ve memleketni uçurımğa üytegenler arasında Qırım Yuqarı Şurasınıñ bir çoq deputatları da bar. Olar qabul etken beyanat ve çağıruvlar ukrain cemiyetini bölmege, Ukrainanıñ territorial bütünligini parçalamağa doğrultılğandır. Soñki eki ay devamında Qırım akimiyet organları yarımada sakinlerini, şu cümleden devlet hızmetçilerini, Kiyevge yollamaqta.

Qırımtatar halqınıñ Meclisi, bunıñ kibi de çeşit millet vekillerini birleştirgen bir sıra cemaat teşkilâtları Ukrainanıñ diktaturağa tayması, qan tökülmesi ve tınç sakinlerniñ öldürilmesini toqtatmaq içün ellerinden kelgen çare-tedbirlerni kördiler ve körmekteler.

Biz, Ukrainada diktatura qurulmasına qarşı Bütünqırım mitinginiñ iştirakçileri

– Ukrainanıñ demokratik ve mustaqil devlet olaraq inkişaf etmesiniñ tarafdarları olaraq,

– ukrain cemiyetiniñ yevrointegratsion ıntıluvlarına, Ukrainanıñ Avropa serbestsever halqlar ailesi olğan Avropa Birliginde aza olmasına qoltutaraq ve yardım eterek,

– memlekette zorbalıq şiddetleşmesi ve Ukrainada diktatura qurulması telükesiniñ ögüni almağa tırışaraq,

– Qırımda yaşağan bütün insanlarnıñ taqdiri, yarımadada barışıq ve tınçlıq içün mesüliet sezerek,

-Qırımda epsi sakinleriniñ musaviyligini teminlegen qanuniy şaraitlerniñ yaratılmasına irişerek

TALAP ETEMİZ.

UKRAİNA YUQARI ŞURASINDAN:

1. 2014 senesi yanvar 16-da alınğan diktatorlıq qanunlar lâğuv etilsin.

2. Ukraina vatandaşları narazılıq aktsiyalarınıñ iştirakçilerini taqip etüv toqtatılsın ve siyasiy mahbüsler azat etilsin.

3. Ukrainanıñ “Milliy mensüpligine köre sürgün etilgen şahıslarnıñ aqlarını ğayrıdan tiklev aqqında” Qanunı qabul etilsin.

4. Qırım Yuqarı Şurasında onıñ sayısından 15 fayızdan az olmağan sayıda qırımtatarlarnıñ kefilli vekâletliginiñ uquqiy mehanizmlerini közde tutqan Ukraina “Qırım Muhtar Cumhuriyeti Yuqarı Şurası deputatlarını saylav aqqında” Qanunı qabul etilsin.

5. Qırım Yuqarı Şurasında onıñ sayısından 15 fayızdan az olmağan sayıda qırımtatarlarnıñ kefilli vekâletliginiñ uquqiy mehanizmlerini közde tutqan Ukraina “Qırım Muhtar Cumhuriyeti Yuqarı Şurası deputatlarını saylav aqqında” Qanunı esasında Qırım Yuqarı Şurası deputatlarınıñ müddetinden evel saylavları ilân etilsin.

UKRAİNA YUQARI ŞURASI VE UKRAİNA NAZİRLER KABİNETİNİÑ YAÑI ERKÂNINDAN:

1. 2014 senesine Ukraina Devlet bücetine Vatanlarına qaytayatqan qırımtatarlarnıñ yerleştirüv programmasına 200 million grivnâ ayırılmasını közde tutqan deñişmeler kirsetilsin.

2. Qırımtatar halqınıñ aqlarını teminlev boyunca Halqara forumda Ukrainanıñ qoltutuvı ve iştiraki aqqında resmiy qarar alınsın.

QIRIM YUQARI ŞURASINDAN:

1. 2014 senesine Qırım bücetine Vatanlarına qaytayatqan qırımtatarlarnıñ yerleştirüv programmasına 50 million grivnâ ayırılmasını közde tutqan deñişmeler kirsetilsin.

2. Qırım Yuqarı Şurasınıñ Prezidiumında “Kurultay-Ruh” fraktsiyasınıñ temsilciligi teminlensin.


QIRIM NAZİRLER ŞURASINDAN:

1. Qırım Muhtar Cumhuriyetiniñ epsi idare ve nazirlikleri yolbaşçılığında qırımtatarlarnıñ vekâletligi teminlensin.

Bizim talaplarımız ve teklif ettigimiz çareler memlekette siyasiy iñqıraznıñ çezilmesine, em umumdevlet, em Qırım Muhtar Cumhuriyeti seviyesinde cemiyet ve ükümet arasında munasebetlerniñ deñişmesine siltem olacağına eminmiz.

Ukrainada diktatura qurulmasına qarşı Bütünqırım mitingi iştirakçileri tarafından qabul etildi.

2014 senesi yanvar 28-de Aqmescit ş.