Meclis yolbaşçılarınıñ Canköy, Qurman ve Seytler regionlarında toplaşuvları

20 Yanvar 2014

18-19 yanvar künleri Meclis yolbaşçıları ve Meclis idare reisleriniñ Canköy, Qurman ve Seytler regionlarından saylanğan Qurultay deputatları, yerli milliy idare organlarınıñ reisleri, yerli şuralarnıñ deputatları ve musulman cemiyetleriniñ reisleri ile birlikte regionlarara toplaşuvları olıp keçti.

Toplaşuvlarnıñ işinde Milliy Meclis reisi Refat Çubarov, Meclis idare reberleri – Zaur Smirnov, Ayder Acimambetov, Emine Avamileva, Seydamet Yagyayev, Kâtibiyet başı Dilâver Akiyev, Meclis azaları Dinara Seytgaziyeva ve Şevket Kaybullayev, Qurultay Teftiş komissiyasınıñ reisi Ali Özenbaş, Qurultay Merkeziy saylav komissiyasınıñ başı Zair Smedlâyev, Qırım musulmanları müftiyiniñ muavini Ayder İsmailov, Canköy, Qurman, Seytler ve Aluşta regional meclislerniñ reisleri Rustem Ennanov, Uçkun Devletşayev, Mustafa Salman ve Enver Arpatlı iştirak ettiler.

Qurman qasabasındaki Medeniyet evinde olıp keçken toplaşuv “Ant etkenmen” qırımtatar milliy ve Ukraina devlet gimnlerinden başlanıp, dua oquldı. Bundan soñ “Elmaz” ansambli artistleriniñ icrasında qırımtatar yır ve oyunları icra etildi.

Toplaşuvnı açqan Meclis reisi Refat Çubarov genç sanatçılarğa böyle sıcaq qarşılağanları ve meraqlı kontsert programmaları içün teşekkür bildirdi.

“Bizim, alınğan qararlar çerçivesinde keçirdigimiz, regionlarara toplaşuvlarımıznıñ maqsadı regionlarda dialognı açıq yapmaq ki, biz biri-birimizni eşiteyik, fikir paylaşayıq ve halqımız oğrunda birlik olıp çalışayıq”, – dedi Refat Çubarov. O, bunıñ kibi de regional meclis reisleri ve azalarından işke üst-ustten yanaşmamaq, alınğan qararlar içün mesüliet taşımaq, yerlerde işni planlı şekilde yapıp, esabatlar bermekni rica etti.

Öz nevbetinde Meclis reisiniñ muavini Zaur Smirnov regional ve yerli meclislerniñ toplaşuvlarını muntazam sürette keçirmekni tevsiye etti. “Toplaşuv ve körüşüvler devamında bizge faaliyet planını muzakere etmek, regionda ağımdaki vaziyetni talil etmek zarur, – dedi Z. Smirnov. – Amma eñ müimi bizlerni milliy idare organlarına saylağan semetdeşlerimiz ögünde esabat bermemizdir”.

Ana tilinde tasilniñ vaziyeti, qırımtatar tiliniñ çeşit saalarda qullanılması, bunıñ kibi de yerlerde qırımtatar tilinde oqutılğan sınıflarnıñ sayısını çoqlaştırmaq boyunci işni quvetlendirmek aqqında idare reisi Emine Avamileva ayttı.

Bundan da ğayrı E. Avamileva regional meclislerniñ reislerine balalarını qırımtatar sınıflarına ya da milliy bağçalarğa bermege istegen ana-babalarğa ariza nümünelerini, Qırımnıñ devlet ve cemaat ömüriniñ bütün saalarına qırımtatar tilini tadbiq etüv meseleleri boyunca Qırım qanunlarınıñ edasını monitoring yapmaq içün anketalarnıñ formalarını berdi.

Meclis Kâtibiyetiniñ işi, bunıñ kibi de regionlarda olıp keçken vaqialar aqqında haberdar etmek ve daimiy dialognıñ zarurlığı, semetdeşlerimizni milliy neşirlerge abune etüv aqqında Kâtibiyet başı Dilâver Akiyev söyledi.

Yanvar 18-19 künleri olıp keçken toplaşuvlarda semetdeşlerimizden tüşken teklif ve sualler esasen 2014 senesi qırımtatar halqınıñ aqlarını tiklev boyunca halqara forum keçirilmesi, qırımtatar halqı sürgüniligiñ 70 yıllığı, İsmail Gasprinskiy vefatınıñ 100 yıllığı, 1 Qurultay reisi, Qırım musulmanlarınıñ müftiyi Noman Çelebicihan öldürilmesiniñ 96 yıllığınen bağlı tedbirler aqqında edi.

Öz nevbetinde Canköy regional meclisi şu regionnıñ Büyük Sonaq köyünde dünyağa kelgen Noman Çelebicihan ömüri ve faaliyetine bağışlanğan tedbirlerni keçirmek teşebbüsinen çıqtı.

Merkeziy saylav komissiyasınıñ reisi Z. Smedlâyev toplaşuv iştirakçilerine muracaat eterken, qırımtatar halqı soyqırımınıñ 70 yıllığı ile bağlı matem merasimlerinde regional ve yerli meclisler birligi ve tertip-nizamlılığını numayış etmek kerekler, dedi.

Toplaşuvda iştirak etken semetdeşler yerlerde, şu cümleden medreselerde qırımtatar tili kurslarını teşkil etmek teklifinde bulunıp, Müftiy muavini Ayder İsmailovğa Aqmescitteki Balalar hastahanesiniñ onkologiya bölügine müftilik vekillerini muntazam sürette yollap, olar hasta balalar içün dua oqumaları ricasınen muracaat ettiler.

Meclis reisi Refat Çubarov, üç regionda ötkerilgen toplaşuvlarnıñ neticelerine yekün çekip, regional ve yerli meclislerniñ ağımdaki faaliyetini muzakere etüvde kösterilgen aktivlik ve teşkilâtçılıqnıñ yüksek seviyesi içün teşekkür bildirdi.