Aluşta civarında sürgünlik qurbanlarınıñ abidesini qırdılar

16 Yanvar 2014

Bellisiz aydutlar Aluşta civarındaki Ulu Üzen köyünde sürgünlik qurbanlarınıñ abidesini parladılar. Aydutlarnı tutmağa yardım etkenlerge para mukâfatı işandırıla. B u aqta Aluşta regional meclis reisi E.Arpatlınıñ sözlerine esaslanıp “15 minut” saytı bildire.

“Ulu Üzendeki abide 2010 sene “Ulu Üzen” Bütünqırım cemaat teşkilâtınıñ küçünen qoyulğan edi, – dey Arpatlı. – Abide ne vaqıt bozulğanı, tam belli degil, amma haberni yanvar 16 künü aldıq”.

Aluşta regional meclis reisi abideni bir kün evelsi qırğanlarını tahmin ete. Haber alğanınen Arpatlı Küçük Üzen köy şurasınıñ başı Sergey Traçuk, Telükesizlik hızmeti ve militsiya hadimlerinen beraber adise yüz bergen yerge bardı.

Uquqqorçalaycılar zarur taqiqat areketlerini keçirip, vaqianı tertipke köre resmiyleştirdiler. Regional meclis reisi Aluşta militsiyası yolbaşçılarınen körüşmek niyetinde.

Bu cinayetni yapqan insanlarnı köstereceklerge Arpatlı para mukâfatı bermekni işandırdı. “Regional meclis reisi olaraq men cinayetçilerni tapmağa yardım etken malümat içün 5 biñ grivnâ bermege vade etem”, – dedi o.

Enver Arpatlınıñ telefonı: +38 050 053 2512

Regional meclis reisi vandallıqnı kimler yapabilecegi aqqındaki sualge cevap berip olamadı.

Ulu-Üzen – —Büyük Aluşta civarında Küçük Üzen köy şurasınıñ erkânına kirgen köy. Qırımnıñ cenübiy-şarqiy yalısında, Aluştadan 15 kilometrde Haphal carı içinde, Cur-cur şellâlesi yanında, Demirci ve Qarabi yaylâlarnıñ arasında yerleşken. 2001 senesiniñ malümatlarına köre köy ealisi 289 candan ibarettir.

1944 senesine qadan köyde qırımtatarlar yaşay edi. Olarnı sürgün etken soñ köyde bir rus qorantası qala. Amma avgust 12-de sovet akimiyeti Qırımğa başqa yerlerden insanlarnı köçürmek qararını alğan soñ, Aluşta rayonına Krasnodar vilâyetinden ge kelip 7500 insan köçürildi.
1945 senesi avugst 21-de Rusiye Federatsiyası Yuqarı Şurası Prehidiumınıñ fermanına köre köyniñ Ulu-Üzen adı Generalskoye dep deñiştirildi.