Mecliste semetdeşlerimizge mesken evlerini qullanuvğa teslim etüv işinde yardım etmek boyunca yañı teşebbüsler amelge keçirile

14 Yanvar 2014

2014 senesi yanvar 12 künü Meclis reberleriniñ regional ve yerli meclisler, yerli şuralarnıñ deputatları ve Aqmeçit regionından 6 çağırılış Qurultayğa saylanğan delegatlar ile ötkerilgen toplaşuvdan soñ Meclis reisi Refat Çubarov ve Meclisniñ qırımtatar milliy areketi veteranları, cemaat teşkilâtlarınen bağlanuv idaresi başınıñ muavini Dinara Seyitgaziyeva Aqmeçit regional meclis reisi Şevket Smailovğa Yarılğaç köyünde üç qırımtatar ailesine evleriniñ qullanuvğa kirsetilgeni aqqında qararlarnı taqdim ettiler.

Vesiqalarnı berirken Dinara Seyitgaziyeva Şevket Smailov ve bunıñ kibi de Yarılğaç köy meclisiniñ reisi Fikret Smailovğa zarur vesiqalarnı azırlavda köstergen yardımları ve faal işleri içün teşekkür bildirip, çünki aynı bu yardım sayesinde şu üç mesken evni qullanuvğa berüvde qıyınlıqlar yeñildi.

İdare reisiniñ muavini qayd etti ki, Meclis yañı erkânınıñ insanlarğa evlerni qullanuvğa berüv boyunca meselelerde konsultatsiya bermek kibi yañı teşebbüsi öz evlerini pek az masraflar esabına qanunlaştırmaq imkânını berir.

“Biz konsultatsiyalar keçiremiz ve insanlarnı ait qanunlar ve vesiqalarnı azırlav tertibinen tanış etemiz, – dedi Seyitgaziyeva. – Bizim vazifemiz insanlarımıznı topraqnı nasıl hususiyleştirmek, evlerni resmiyleştirmek meselelerinden haberdar etmektir. Bu mesele esasen Vatanğa qaytıp eV qurğan halqımıznıñ büyük bir qısmına aittir”.

Dinara Seyitgaziyeva qayd etti ki, Meclisniñ qırımtatar milliy areketi veteranları, cemaat teşkilâtlarınen bağlanuv idaresi qırımtatar halqı milliy areketiniñ veteranları ve umumen, 1944 senesi mayıs 18-de sürgünlikke oğratılğanlarnıñ episine evlerini qullanuvğa kirsetüv işinde yardım bermege azır. Bundan da ğayrı semetdeşlerimizniñ esas problemleri sırasına 16 yaşını toldurğan balalarınıñ cedvelge alınmağanı, evlerge elektrik ve gaz ağlarını keçirüvnen bağlı meseleler kirmekte.

Semetdeşlerimiz bedava konsultatsiya almaları içün İdare regional meclisler ile ait iş alıp baracaq ve Meclisniñ merkeziy ofisinde tasdiqlanğan cedvel boyunca (aynıñ birinci ve soñki bazarertesi künleri) vatandaşlarnı qabul etecek.