Meclis yolbşaçıları ve Meclis idareleri reberleriniñ Kezlev regionında körüşüvi

13 Yanvar 2014

2014 senesi yanvar 11 künü Meclis yolbaşçıları ve idare reberleriniñ Kezlev regionından Qurultay delegatları, yerli idare organlarınıñ reisleri, yerli şuralar deputatları ve musulman cemiyetleriniñ reisleri ile regional körüşüvi olıp keçti.

Toplaşuvda Meclis reisi Refat Çubarov, reis muavinleri Zaur Smirnov, Ayder Acimambetov, Aslan Ömer Qırımlı, Nariman Celâl, Ahtem Çiygoz, Meclis idare ve hızmetleriniñ reberleri Seydamet Yagyayev, Bekir Mamutov ve Gayana Yüksel, Meclis azaları Dinara Seytgaziyeva, Zeynur Yakubov, İbraim Çegertma, Qurultay teftiş komissiyasınıñ reisi Ali Özenbaş, bunıñ kibi de Kezlev regional meclis reisi Suleyman Abdullayev iştirak ettiler.

Toplaşuv devamında Meclis reisi Refat Çubarov toplanğanlarnı 2013 senesi dekabr ayında Qırımnıñ 11 regionında ötkerilgen toplaşuvlar aqqında malümat berip, şu toplaşuvlarda Meclis idare ve hızmetlerinen, olarnıñ vazifeleri ve vekâletlerinen tanış etilgeni, regional meclislerniñ faaliyeti boyunca fikir paylaşılğanını bildirdi.

“Birlikte semereli çalışuv ve daimiy dialog milliy idare organlarınıñ halq ile çalışuvınıñ esasıdır”, – dep qayd etti R. Çubarov. Meclis reisiniñ aytqanına köre regionlarara körüşüvlerniñ neticesi olaraq Aqmescitte bütün regionlar vekilleriniñ iştirakinde keniş körüşüv keçirilip, onda milliy idare organlarnıñ 2014 senesine faaliyetiniñ esas yönelişleri baqılacaq ve işlenecek.

Meclis reisiniñ muavini Zaur Smirnov Kezlev regional meclis reisi ve azalarınıñ diqqatını öz faaliyetini planlaştırmaq ve keçirilgen tedbirlerniñ neticeleri boyunca muntazam sürette esabat bermek zarurlığına celp etti.

Meclis idare ve hızmetleriniñ reberleri Kezlev regionı aktivinen qonuşırkenler, semetdeşlerimiz arasında milliy neşirlerge abune olmaqnı teşviq etmek kerekligini de qayd ettiler. “Bizim milliy gazetalarımız ve mecmualarımız, televideniye, radio ve internet neşirler – bu siziñ minberiñizdir, – dedi Meclisniñ medeniyet, tarih ve maneviy ömür idaresiniñ başı Bekir Mamutov. – Yazıñız, telefon açıñız, ikâye etiñiz, semetdeşlerimiz ömürinde olğan vaqialar aqqında haber etiñiz, teklif ve fikirleriñiznen paylaşıñız”.

Meclis reisiniñ muavinleri Ahtem Çiygoz ve Ayder Acimambetov Kezlev regionındaki semetdeşlerge şunı haber ettiler ki, Qırımtatar halqı tarihiy vatanından sürgün etilgeniniñ 70-nci yıldönümi arfesinde 2013 senesiniñ dekabr 10-ndan qırımtatarlarnıñ siyasiy aktsiyası başlandı. Onıñ baş maqsadı qırımtatar halqı aqlarınıñ ğayrıdan tiklenmenmesidir.

“Endi çoq vaqıttır ki devlet reberleri tarafından bu saada yapıcı, konkret bir qararlarnı körmeymiz, – dedi Çiygoz. – Şu sebepten biz halqımız problemleriniñ adaletli ve obyektiv çezilmesi oğrunda faal çarelerge keçmege mecburmız”.

Öz nevbetinde Aslan Ömer Qırımlı öz idaresiniñ işi aqqında aytırken, milliy idare organlar sistemasında birinci kere qurulğan müessiseniñ baş vazifesi qırımtatar halqı iqtisadiyatı inkişafınıñ, potentsialı ve istiqballeri strategiyasını işlemektir, dedi. “İdaremiz bütün regional meclisler, regionnıñ iş adamları ile çalışmağa azır ve açıqtır, – dep qayd etti A.O.Kırımlı.

Regionlarara körüşüv devamında regional meclis ve onıñ temsilcilikleriniñ faaliyetine ait ağımdaki problemler boyunca fikir paylaşıldı. Regional meclisniñ toplaşuvlarını muntazam keçirmek, saylavcılar ögünde esabat bermek zarurlığı qayd etilip, regional mecliske faqat hatıra künlerinde degil de, er kün aktiv olmaq tevsiye etildi.

Körüşüvniñ yeküninde Meclis reisi Meclis ve idare reberleri dialog ve halqnıñ taqdirinen bağlı meselelerniñ birlikte çezilmesi içün içün daima açıq olğanına diqqatnı celp etti. Refat Çubarov şunı da qayd etti ki, er bir qırımtatarı Ukraina vatandaşı olaraq cumhuriyet ve devlet ükümeti vekillerinden akimiyet bergen vekâletleri ve imkânları çerçivesinde öz problemleriniñ çezimini talap etmege aqlıdır.