Meclis Kâtibiyetiniñ başı Dilâver Akiyev: «Qırımtatar halqınıñ meclisi Ukrainanı demokratlaştıruv oğrundaki bütün qararlarğa daima qoltuttı»

13 Yanvar 2014

Keçken tatil künleri Harkovda olıp keçken Ukraina Yevromaydanlar forumında memleketniñ er bir şeerindeki Yevromaydanlar vekilleri iştirak ettiler. Bu aqta forumğa közetici sıfatında davet olunğan Meclis Kâtibiyetiniñ başı Dilâver Akiyev bildirdi.

Forumda bunıñ kibi de “Іnstitut gromadânskogo suspіlstva” teşkilâtınıñ başı Rustem Ablâtif ve “Yaşlar şurası” gençler teşkilâtınıñ azası Ali Ametov bulundılar. Şunı qayd etmeli ki, Meclis delegatsiyası forumğa közeticiler sıfatında davet etildiler.

D.Akiyevniñ aytqanına köre Yevromaydanlar forumını keçirmek içün teşkilâtçılarğa bina bermediler. “Neticede Forumnıñ işini Harkov şeerindeki kilsede başlamağa mecbur oldıq, – dey Akiyev. – Kilsege kirgenimiznen qararnen 30 “tituşkalar” binağa ücüm etmege tırıştılar. Amma teşkilâtçılar qapılarnı qapatıp, fesatçılarnı içeri kirsetmediler”.

Dilâver Akiyev şunı da qayd etti ki, forum işiniñ çerçivesinde oña Meclis adından çıqış yapmaq içün söz berildi. “Qırımtatar halqınıñ meclisi Ukrainanı demokratlaştıruv ve Ukrainanıñ yevrointegratsiya oğrundaki bütün qararlarğa daima qoltutıp kelmekte, – dedi Akiyev ve qayd etti ki, 70 yıl devamında qırımtatarlar 1944 senesi taptalğan aqları içün küreşni zorbalıqsız-qansız usullar ile alıp barmaqtalar.

Forumnıñ işi aqqında ikâye eterken Meclis Kâtibiyetiniñ başı qayd etti ki, iştirakçiler iş formatını bir qaç profil komitetlerge böldiler – “Ukraina mesülietli demokratiyanı tesis etmek boyunca areket planını işlev”, “Yevromaydanlar arasında alâqa ve areketlerni koordinirlevniñ mehanizmlerini quruv”, Yevromaydanlarnıñ telükesizligi ve qanuniy qorçalav”, “Yevromaydanlarnı maddiy teminlev sisteması”, “Yevromaydanlarnıñ zekâviy ve icadiy işbirligi”, “İnformatsion siyaset koordinatsiyası. Umumiy informatsion siyaset”, “Yevromaydanlarda vatandaşlar tasili sisteması”.

“Komitetlerniñ işi Yevromaydan aktivistleriniñ kelecekte faaliyeti içün strategiya ve taktik vazifelerni işlep çıqaruvdan ibaret oldı.

Biz rey berüvde iştirak etmedik, çünki közeticiler sıfatında qatıldıq, – dep qayd etti D. Akiyev. – Forum yekünlengen soñ bütün iştirakçiler sıranen Şevçenko meydanına miting olacaq yerge kettiler”. Dilâver Akiyevniñ aytqanına köre yerli akimiyet planlaştırılğan mitingniñ keçirilmesine er türlü keder etmege tırıştı, Harkovnıñ meydanı Regionlar partiyası tarafdarları tarafından işğal etildi.

“Bundan da ğayrı Şevçenko meydanı taba keteyatqan Ukraina Yevromaydanlar forumınıñ iştirakçilerini yol boyu “tituşkalar” taqip etip bardılar, – dedi D. Akiyev.

Forum iştirakçileriniñ mitingi ep bir keçirildi, amma Yaroslav Mudrıy adına meydanda olıp, onda 500-den ziyade insan iştirak etti. “Miting başlanğanından mahsus aletleri olğan eki araba keldi ve bizim mikrofonımıznıñ sesini kesmek içün muzıkanı bağırtıp qoydılar, – dep ikâye ete D. Akiyev. – Milislerden ibaret qaravullar olsa da, “tituşkalar” üstümizge petardalar attılar.

D.Akiyev qayd etkenine köre, fesatlarğa baqmadan Yevromaydanlar forumınıñ iştirakçileri planlaştırğan bütün tedbirlerini keçirmege muvafaq oldılar.