Meclis reisi Refat Çubarov 1991 senesi yanvar ayında Litvaniya mustaqilligi ve litvaniya halqınıñ serbestligi içün qurban ketkenlerniñ hatırasını añdı

13 Yanvar 2014

Litvaniya Cumhuriyetiniñ Prezidenti

Dali Gribauskayte hanımğa
 

1991 senesi yanvar ayında Litvaniya mustaqilligi ve litvaniya halqınıñ serbestligi içün qurban ketkenlerni Qırımtatar halqınıñ Meclisi adından teren sayğı ile añmaqtam.

Litvaniya halqınıñ öz serbestligi ve mustaqilligi, adalet, birleştirilgen Avropa şaraitinde demokratiya ve eyiqomşulıq ideallarını pekitüv içün küreşte köstergen cesürligi ve fedayiligi barışıq ve eyilikke tırışqan cemi halqlar içün örnek oldı.

1991 senesi yanvar ayınıñ facialı künlerinde qırımtatarlar diger halqlar sırasında litvaniya halqına qoltuttı.

Biz siz ile Ukrainanıñ yevrointegratsion niyetleriniñ kerçekleşmesi oğrunda bugünki işbirligimiz ve ortaqlığımızğa büyük qıymet kesemiz.

Litvaniya Cumhuriyetiniñ ükümeti ve Seymi Qırımtatar halqı Meclisiniñ qırımtatar halqınıñ aqlarını tiklev, Ukrainada saqlanıp qalması ve inkişaf etmesi içün halqara forumnı azırlav ve keçirüv teşebbüyüslerine qoltutqanı içün minnetdarmız.

Litvaniya serbestligi ve mustaqilligi içün qurban ketken qaramanlarğa şan-şerefler!
 

Refat Çubarov
Qırımtatar halqı Meclisiniñ reisi