2014 senesi yanvar ayında ötkerilecek regionlarara iş toplaşuvlar cedveli tasdiqlandı

10 Yanvar 2014

Qırımtatar halqı Meclisiniñ 2014 senesi yanvar 10 künü ötkerilgen toplaşuvında Meclis ve Qırım musulmanları diniy idaresiniñ regional ve yerli meclisler, yerli şuralarnıñ deputatları ve VI çağırılış Qurultay delegatlarınen 2014 senesi yanvar ayında keçirecek seyyar iş toplaşuvlar cedveli tasdiqlandı.

Cümleden, Meclis reisiniñ muavini Zaur Smirnov haber etkenine köre yanvar 11 künü Kezlev regionında, yanvar 12-de – Aqmeçit regionı, yanvar 18-de – Canköy regionı, yanvar 19-da – Qurman ve Seytler regionlarında, yanvar 25 künü – Aqmescit regionı, yanvar 26 künü – Or qapı, Aqşeyh ve Curçı regionlarında, yanvar 31-de ise Bağçasaray regionında toplaşuvlar keçirilecek.

Bundan da ğayrı, toplaşuv çerçivesinde Meclis idare ve hızmetleriniñ tedbirler planı baqıldı, bunıñ kibi de qırımtatar halqınıñ tarihında 2014 senesi qayd etilecek emiyetli vaqialarnı qayd etüvnen bağlı teşkilâtiy meseleler muzakere etildi.

Yaqın künlerde qırımtatar halqınıñ körümli siyasiy ve cemaat erbabı. Qurultaynıñ birinci reisi Noman Çkelebicihan öldürilgeniniñ 96 yıllığı munasebetinen hatıra tedbirlerini azırlav ke keçirüdv boyunca iş gruppasınıñ erkânı tasdiqlanacaq.

Bunıñ kibi de Meclisniñ nevbetteki toplaşuvında qırımtatar halqı soyqırımı(sürgünlikniñ 70 yıllığı) qurbanlarınıñ hatırasına bağışlanğan matem merasimlerini azırlav ve ötkerüv boyunca teşkiliy komitet ve İsmail Gasprinskiy vefatınıñ 100 yıllığına bağışlanğan hatıra tedbirlerini azırlav ve ötkerüv boyunca teşkiliy komitet erkânları tasdiqlanacaq.