Davalı «Hatırlamamıznı rica ettiler» Şarqiy Qırım hatıra kitabı” boyunca iş hususında taqiqat devam ettirilecek

09 Yanvar 2014

Mahkemede davacı Meclis reisi, Qırım Yuqarı Şurasınıñ deputatı Refat Çubarovnıñ menfaatlarını temsil etken Meclis adliye idaresiniñ başı Teyfuq Ğafarovnıñ bildirgenine köre 2014 senesi yanvar 9 künü İslâm Terek rayon mahkemesinde mezkür fakt boyunca cinaiy işniñ qanunsız qapatılğanı aqqında mesele boyunca dava açtılar.

“Hatırlamamıznı rica ettiler” Şarqiy Qırım hatıra kitabı milletlerara dava qozğağanı faktı boyunca iş hususında taqiqat devam ettirilecek”, dedi T.Ğafarov.

Belli ki, Refat Çubarovnıñ deputatlıq soravına binaen Qırım prokuraturası “Hatırlamamıznı rica ettiler” Şarqiy Qırım hatıra kitabı Ukraina Cinaiy kodeksiniñ 161-nci madde 1-nci qısmı boyunca (milletlerara dava qozğağanı) içün cinaiy iş açqan edi. “Bu iş boyunca taqiqat soñunace yapılmadı, dep sayamız, – dep añlattı T. Ğafarov. – Çünki ekspertiza sadece kitap müellifi V. Şirşovnıñ añlatmaları esasında yapıldı”.

Teyfuq Ğafarov emin ki, tekrar ekspertizanı kitap müellifi işaret ettigi tarihiy devirdeki faktlarğa obyektiv izaat bergen tarihçı mütehassıslar arasında sorav keçirilgen soñ yapılabilir. Meclis adliye idaresiniñ başı Teyfuq Ğafarov bildirgenine köre o, kitapta yer alğan sahte faktlarnı faş etüv işine tarihçılarnı celp etmek maqsadında.

Hatırlatamız ki,İslâm Terek rayonında bücet sermiyalarına qırımtatar halqınıñ 1944 senesi mayıs 18 sürgünligini aqlağan ve milliy, ırqiy ve diniy dava, nefret ve duşmanlıq qozğayabilgen sözler yer alğan, Vladimir ve Mariya Şirşovlar tertip etken “Hatırlamamıznı rica ettiler” Şarqiy Qırım hatıra kitabı neşir etildi.

Müelliflerniñ fikrince bu kitapqa oquv qullanma statusı berilip, İslâm Terek rayonınıñ mektepleri ve kütüphanelerinde tarqatılması kerek.

2013 senesi avgust 12-de Davalı “Hatırlamamıznı rica ettiler” Şarqiy Qırım hatıra kitabı”na qarşı umumqırım mitingi keçirilip, onıñ iştirakçileri kitap müellifi Vladimir Şirşovnı İslâm Terek rayonınıñ fahriy sakini unvanından mahrum etilmesi ve İslâm Terek rayon devlet memuriyetiniñ başı Öleg Gоrdeyevni istifağa çıqarmaqnı talap ettiler.