2014 senesi YÜNESKO imayesi altında ulu qırımtatar mütefekkiri İsmail Gasprinskiy hatırasına bağışlanğan tedbirler keçirilecek

26 Dekabr 2013

2013 senesi dekabr 26 Meclis yolbaşçıları ve Meclis idare reberleriniñ Aqyar regionından saylanğan Qurultay delegatları, yerli milliy idare organları, yerli şuralarnıñ deputatları ve musulman cemiyetleriniñ reislerinen regionlarara toplaşuvı olıp keçti.

Toplaşuvda Meclis reisiniñ muavinleri Zaur Smirnov ve Ayder Acimambetov, Meclis idare ve hızmetleriniñ reberleri Emine Avamileva, Teyfuk Gafarov ve Gayana Yüksel, Meclis azaları Dinara Seytgaziyeva, Qurultay Teftiş komissiyasınıñ başı Ali Özenbaş, Müftiy muavini Ayder İsmailov, Aqyar regional meclis reisi Enver Mamutdinov ve Aluşta regional meclis reisi Enver Arpatlı iştirak ettiler.

“Bu seneniñ dekabr ayında Refat Çubarov Meclisniñ idare ve hızmetleriniñ reberleri, Teftiş komissiyasınıñ reisi ve Müftiyat hadimlerinen birlikte Qırımnıñ on regionında toplaşuvlar keçirdiler, – dedi toplaşuvnıñ başında Meclis reisiniñ muavini Zaur Smirnov. – Böyle toplaşuvlar pek müim ve epimiz içün faydalıdır. 2014 senesiniñ yanvar ayında bunıñ kibi körüşüvler Qırımnıñ qalğan regionlarında da keçirilecek. Bizim baş vazifemiz milliy meseleni deklarativ şekilde muzakere etmekten halq menfaatı oğrunda keyfiyetli ve faydalı neticege keçmektir”.

Z. Smirnovnıñ aytqanına köre seyyar toplaşuvlar keçirilgen soñ Aqmescitte bütün regionlar vekilleriniñ iştirakinde kenişletilgen körüşüvni ötkermek planlaştırıla. Onda qırımtatarlar milliy idare organlarınıñ 2014 senesine faaliyetiniñ strategiyası baqılacaq.

Zaur Smirnov Aqyar regional meclis aktivini işni tertip ile alıp barmaq içün zarur vesiqalarnıñ tasdiqlanğan şekillerinen tanış etti.

Öz nevbetinde Meclis idare reberi Emine Avamileva toplaşuv iştirakçilerine YÜNESKO 2014 senesini ulu qırımtatar mütefekkiri İsmail Gasprinskiyniñ hatıra yılı olaraq ilân etkenini bildirip, regional meclisniñ iş planına büyük alimniñ hatırasına bağışlanğan tedbirlerni kirsetmekni tevsiye etti.

“Tasil, til ve neşriyat boyunca bölükleri olğan idaremiz 2014 senesine kenişletilgen iş planını azırladı, – dedi Avamileva. – Biz regionlardan da bu taqvimge kirsetilecek vaqia ve hatıra künleriniñ cedvelini bekleymiz”

Milliy devriy neşirlerge qoltutmaq, regionlardaki vaqialardan haberdar etmek kerekligi aqqında Meclisniñ Milliy kütleviy matbuat vastalarınıñ inkişafı idaresiniñ başı Gayana Yüksel ikâye etti. Onıñ aytqanına köre, bu maqsadnen reberligi altındaki idare 2014 senesi regional meclisler içün kütleviy matbuat vastalarınen ve cemaatçılıq vekillerinen çalışuv alışqınlığını aşlamaq boyunca seminar trening keçirmek niyetinde.

Öz imkânlarına köre ve milliy ruhnıñ yüksek seviyesi sayesinde Aqyar regionında yaşağan 5000 qırımtatarı Qırımtatar medeniyetini ğayrıdan tiklev merkezini meydanğa ketirip, “Aqyar dalğası” yayınını azırlaylar. Eki bala ansambli çalışa. Lâkin problemler de yoq degil, şu cümleden Aqyarda alâ daa milliy mektep açılmadı.

“2014 senesi “Muniver” mustaqil diniy teşkilâtnıñ teşebbüsi ve meclisimizniñ qoltutuvında biz Aqyardaki yekâne caminiñ 100 yıllığına bağışlanğan tedbirler keçirecekmiz”, – dey Aqyar regional meclis reisi Enver Mamutdinov

“Muniver” mustaqil diniy teşkilâtnıñ reisi Enver Resulevniñ daveti ile Meclis yolbaşçıları ve idare reberleri Aqyarnıñ büyük camisini ziyaret ettiler. “Arbiy arhiv yerleştirilgen caminiñ halqımızğa qaytarılmasını biz 1990 senesinden berli talap etemiz, – dep ikâye ete Enver Resulev. – Türkiyeniñ yardımı sayesinde 1994 senesi camini restavratsiya yaptıq, medrese açtıq. Bugünde-bugün onda 20 sohta oqumaqta”.

E.Resulevniñ bildirgenine köre camide 300 adam sığabile. “Yaqın arada mahsus sımarış boyunca yasalğan caminiñ kiriş qapıları da qoyulacaq, – dey Aqyar camisiniñ ğayrıdan tiklenmesi ve çalışması içün çoq yıllardan berli küçüni sarf etip kelgen E. Resulev.

Meclis reisiniñ muavini Zaur Smirnov Meclis adından Aqyar regional meclis reisi ve “Muniver” din cemiyetiniñ reisi Enver Resulevge qırımtatar halqınıñ maneviy ve medeniy degerliklerine köstergen ayrıca diqqatı ve qayğıruvı içün teşekkür bildirip, Qırım musulmanları diniy idaresinen sıqı bağ tutıp çalışması regionda diniy stabillikni teminlep, sahte diniy aqımlarğa yol bermeycegini qayd etti.