Ukraina halq deputatı Mustafa Cemilev «2014 senesine Ukraina devlet büceti aqqında» Ukraina qanunı leyhasına tekliflerini yolladı

25 Dekabr 2013

2013 senesi dekabr 19 künü Ukraina ükümeti  Ukraina Yuqarı Şurasına “2014 senesine Ukraina  devlet büceti aqqında” Ukraina qanunı leyhasını kirsetti. 

Milliy mensüpligi boyunca sürgün etilip, Ukrainağa qaytqan qırımtatar halqınıñ qaytarıluvı ve yerleştirilüvi boyunca tedbirlerni finansirlevniñ bücette seviyesi yeterli olmağanı munasebetinen  Ukraina halq deputatı Mustafa Cemilev Ukraina Yuqarı Şurasınıñ Bücet meseleleri boyunca komitetniñ reisi  YE. Geller ve Ukraina baş naziri N. Azarovğa deputat soravını yolladı.

Onda Mustafa Cemilev cümleden qayd etti ki, soñki yıllar devamında  Ukraina devlet büceti  qırımtatar halqınıñ qaytarıluvı ve yerleştirilüvi boyunca tedbirlerge  aman-aman 150 million grivnânı bermedi, 2014 senesiniñ bücetinde planlaştırılghan masraflar  Devlet programmasında belgilengen masraflarnıñ ancaq 2,47 fayızını teşkil ete. 

Ukraina halq deputatı  Cemilev 2014 senesiniñ bücetiniñ mezkür maddelerge ayırılacaq sermiyalarnı 208 million grivnâğa qadar arttırmaqnı teklif etti. 

Halq deputatı  çinovnikler tedbirlerniñ finansirlenmemesi ve bunıñ iqtisadiy aqibetleri  içün şahsen cevapkâr olğanlarını  qayd etti.

Muracaatnıñ tolu metini ile saytta tanış olmaq mümkün.

Ukraina halq deputatı  Mustafa Cemilevniñ resmiy saytınıñ

malümatı esasında