Meclis reisi Ukrainada akrreditatsiya etilgen diplomatik korpus ve halqara teşkilâtlarnıñ vekillerini grigorian taqvimi boyunca Hristosnıñ doğuvı ile hayırladı

24 Dekabr 2013

Ukrainadaki çetel diplomatik temsilciliklerniñ yolbaşçıları ve hadimlerine

Ukrainadaki halqara qurumlar ve teşkilâtlar temsilcilikleriniñ yolbaşçıları ve hadimlerine

Sayğılı hanım ve beyefendiler!

Grigorian taqvimi boyunca Hristosnıñ doğuvı ile sizlerni, yaqınlarıñız ve aqrabalarıñız, memleketleriñizniñ şu bayramnı qayd etken vatandaşlarını hayırlamaqnı şeref dep bilem.

İnsanlarğa nimetini bahşış etken Yüce Rabbi insaniyetke ve bütün halqlarğa barışıq ve muabbetlikte yaşamaq imkânını berdi.

İnanamız ki, Rabbiniñ merhameti ve cemi namuslı ve adaletli insanlarnıñ, öz faaliyetlerini dünyanıñ bütün halqları içün, olarnıñ milliy ve diniy mensüpliklerinden qatiy nazar musaviy aq ve imkânlar bermek printsiplerine esaslandırğan devletlerniñ ükümetleri, halqara institutsiyalarnıñ areketleri ile qırımtatar halqınıñ öz toprağı – Ukraina devleti erkânındaki Qırımda aqlarınıñ ğayrıdan tiklenir!

Refat Çubarov
Qırımtatar halqı Meclisiniñ reisi