Meclis reisi Refat Çubarov: Bizim vazifemiz tenqidden konkret tekliflerge keçmek

21 Dekabr 2013

2013 senesi dekabr 21 künü Meclis yolbaşçıları ve idare reberleriniñ Yedi Quyu (Lenin rayonı), Kerç ve Kefe şeerlerinden saylanğan Qurultay delegatları, yerli idare organları, yerli şuralarnıñ deputatları ve musulman cemiyetleriniñ reisleri ile toplaşuvı olıp keçti.
Toplaşuvda Meclis reisi Refat Çubarov, Meclis idare ve hızmetleriniñ başı

Zaur Smirnov, Ayder Acimambetov, Seydamet Yağyayev, Emine Avamileva, Meclis azası Gülnara Bekirova, Qurultay Teftiş komissiyasınıñ reisi Ali Özenbaş, Aluşta regional meclis reisi Enver Arpatlı, Qırım musulmanları Müftiyiniñ yardımcısı Enver Nogaşev, bunıñ kibi de Yedi quyu regional meclisniñ yañı saylanğan reisi Lenur Ablâzimov, Kefe regional meclisiniñ reisi İbraim Murasov ve Keriç regional meclis reisiniñ muavini Esat Batalov iştirak ettiler.

Regionlarara toplaşuv devamında Meclis reisi Refat Çubarov regional ve yerli meclis vekillerini kendilerine avale etilgen vazifelerni eda etüvde aktiv ve mesülietli olmağa çağırdı. Meclis reisi R. Çubarov şunı qayd etti ki, milliy idare organları azalarınıñ vazifesi semetdeşlernen körüşüvler keçirmek, körüşüv ve toplaşuvlarnıñ protokollarını alıp barmaq ve yapılğan iş aqqında region sakinlerini muntazam sürette haberdar etmektir.

“Er bir regional ve yerli meclisniñ belli bir devirge, semetdeşlernen kelişilgen konkret iş planı olması kerek, – dedi R. Çubarov. – Bizim vazifemiz tenqidden konkret tekliflerge keçmek, halq menfaatları oğrunda birleşip çalışmaqtır. Bu ise halqımız birligi ve inkişafınıñ reinidir”

Öz nevbetinde Meclis idare ve hızmetleriniñ yolbaşçıları toplaşuv iştirakçilerini faaliyetleriniñ esas vazifeleri ve yönelişlerinen tanış etip, Milliy Mecliste semetdeşlerni qabul etüv cedvelini de bildirdiler.

Meclis reisiniñ muavini Zaur Smirnov regional ve yerli meclis reisleriniñ diqqatını olarnıñ işlerini mükemmelleştirecek bir sıra teşkilâtiy tedbirlerge celp etti. Cümleden Milliy idare organları, Qırımnıñ devlet ve icra akimiyeti, yerli idare organları, bütün seviyelerdeki şuralarnıñ deputatlarınen çalışuv idaresine berilecek altı tasdiqlanğan forma, olarnı tolduruv tertibi ve berüv müddetlerini seslendirdi.

Qırımtatarlar sürgünligi aqqında hatırlavlarnı toplav işini devam ettirüv, “Unutma” aktsiyasınıñ emiyeti. Ukraina Yuqarı Şurasını qırımtatar halqınıñ aqlarını ğayrıdan tiklemek ve ait qanunnı qabul etmege çağırğan muracaatqa qoltutuv aqqında Qırımtatar halqı milliy areket veteranları, cemaat teşkilâtlarınen bağlanuv idaresiniñ başı Ayder Acimambetov ayttı.

“2014 senesi mayıs 18 künü SSSR kommunist rejimi tarafından halqımızğa nisbeten yapılğan soyqırımnıñ 70 yıllığı qayd etilecek, – dep hatırlattı Ayder Acimambetov. – Ukraina devleti qırımtatar halqınıñ içtimaiy, siyasiy, sotsial ve medeniy aqlarınıñ ğayrıdan tiklenmesi aqqında iç bir qanun qabul etmedi. Ve bu mustaqil Ukraina çerçivesinde qırımtatarlar aqsımlanmasınıñ sebebidir”. Onıñ aytqanına köre muracaatnıñ baş maqsadlarından biri Ukraina Prezidenti ve Ukraina Yuqarı Şurasından 2014 senesi mayıs ayına qadar qırımtatar halqınıñ 1944 senesi mayıs 18-de sürgün etilmesini açıqtan-açıqtan qaralamaqnı talap etüvdir.

“Bundan da ğayrı biz qırımtatar halqınıñ qaytarılması, yerleştirilmesi ve aqlarınıñ ğayrıdan tiklenmesi boyunca qanunlar, şu cümleden qırımtatarlarnıñ parlamentte vekâletligini teminlegen qanuniy mehanizmlerni közde tutqan “Qırım Yuqarı Şurası ve yerli şuralarnıñ deputatlarını saylav aqqında” qanunnıñ qabul etilmesini talap etemiz”.

Öz nevbetinde toplaşuv iştirakçileri toplaşuvda seslendirilgen mesele ve tevsiyeler boyunca semetdeşlerimiz arasında añlatuv işini alıp barmağa azırlıqlarını bildirip, köy ve qasabalarda milliy neşirlerge abune kampaniyasına qoltutmaq zarurlığını qayd ettiler.

Hatırlatamız ki, nevbetteki kenişletilgen toplaşuv 2013 senesi dekabr 26 künü Aqyarda ötkerilecek.