Refat Çubarov: «Milliy tasilni ğayrıdan tiklev oğrunda qırımtatar halqı ilmiy cemaatçlığınıñ birleşmesi zarur»

20 Dekabr 2013

Dekabr 20 künü Qırımtatar halqı Meclisiniñ ofisinde Meclis reisi Refat Çubarov Tavriya Milliy Universiteti qırımtatar ve şarq filologiyası fakultetiniñ dekanı professor Ayder Memetov ile körüşti. Meclisniñ qırımtatar tilinde tasil ve qırımtatar tilini Qırımnıñ devlet ve cemaat ayatına tadbiq etüv meseleleri boyunca Emine Avamileva da iştirak etken bu

körüşüvde qırımtatar ve şarq filologiyası fakultetiniñ faaliyetine dair meseleler muzakere olundı. Cümleden, Ayder Memetov tekrar qayd etti ki, reberligindeki fakultetniñ universitet yolbaşçıları tarafından tarqatılğanı taqdirde menfiy aqibetlerge ketiirebilir.

Meclis reisi bunıñ kibi de qırımtatar tilinde oqutılğan mektepler içün ocalarnı azırlav problemini de muzakere etmekni teklif etti. Birinci nevbette fen ocalarını, yani derslerini qırımtatar tilinde alıp barğan tarih, cemiyet, ahlâq, coğrafiya, biologiya, fizika ve diger fen ocalarını azırlav aqqında söz yürsetildi. Ayder Memetovnıñ bildirgenine köre, milliy mektep ve sınıflarnı zarur kadrlarnen teminlemek içün onıñ fakulteti bu fen ocalarını azırlamağa azır.

Refat Çubarov ise Qırımtatar halqınıñ Meclisi TMU Qırımtatar ve şarq filologiyası fakultetine qoltutmağa azırlığını bildirip, Milliy Meclis faaliyetiniñ esas yönelişlerinden biri olğan milliy tasilni ğayrıdan tiklev oğrunda qırımtatar halqınıñ ilmiy cemaatçlığınıñ birleşmesi zarurlığını qayd etti.