Mustafa Cemilev: Qırımtatarlar, akimiyet milliy bayraqlarımıznı yüzsüce ellerine tuttırğan bir qaç on “tituşkalardan” ğayrı, daima Ukraina milliy-demokratik küçlernen beraber olacaqlar

18 Dekabr 2013

Bu aqta Ukraina halq deputatı, SSSRde İnsan aqları qorçalav teşebbüsçi gruppasınıñ esasçılarından ve azalarından biri, sovet kamplarınıñ mahbüsi, Milliy Meclis reisi (1991-2013 ss.), Mustafa Cemilev Mustaqillik Meydanında Kiyevde dekabr 17 künü yapqan çıqışında söyledi.

Aşağıda M. Cemilev çıqışınıñ tolu versiyanını ilve etemiz

Qıymetli dostlar, vatandaşlar ve semetdeşler!

Men siziñ qarşıñızda faqat “Batkivşçina” fraktsiyasınıñ deputatı olaraq degil de, bütün qırımtatarlar tarafından saylanğan aliy vekâletli organı – qırımtatar halqınıñ Meclisi adından çıqışta bulunmaqtam. Emin oluñız ki, öz milliy ananelerine sadıq olğan qırımtatar halqı daima Ukraina milliy demokratik küçlernen beraberdir. Tabiiy ki, bir qaç on “tituşkalardan” ğayrı, yazıq olar bizde de bar, olarnı mında öz mitingine akimiyet ketirdi ve yüzsüzlerce ellerine milliy bayraqlarımıznı tuttırdı. Bizde olarğa “sebatuşki” deyler. Yevromaydan ve Ukrainanıñ Avropa yoluna Qırım musulmanlarınıñ diniy idaresi de açıq qoltutmaqta.

Bugün Meydanğa eyecan, sayğı ve ümüt ile yalıñız bütün Ukraina degil de, mubalâğasız demek mümkün, bütün dünya baqmaqta. Bugün siz bizim belâlı devletimiz Ukrainanıñ şerefi ve namusını qorçalamaqtasıñız. Devletimiz Avropa demokratik devletler sırasına kirecegi ya da evelki totalitar imperiyasını ğayrıdan tiklemek arzusınen yaşağan qomşu devletniñ ilâvesi olacağı bizim cesürligimizge bağlıdır.

Üç afta evelsi memleket Açlıqnıñ 80 yıllığını qayd etti. Misli körülmegen bu vahşiy cinayet aqibetinde açlıqtan 5 million vatandışımız elâk oldı. Ebet, aradan çoq vaqıt keçti, amma közleriñizni yumıp bir tasavur etiñiz – beş million ceset, şu cümleden bir buçuq-eki million balaçıqlarnıñ cesetlerini köz ögüñizge ketiriñiz. Ne içün oldı bu? Ukrainlerniñ öz iqtisadiy ve siyasiy mustaqilliklerine tırışuvlarını toqtatmaq, “ukrain milletçiliginiñ belkemigini qırmaq” içün yapıldı. Çünki qudretli sovet imperiyasını Ukrainasız qurmaq mümkün degil edi. İmperiya ise onıñ halqlarına adsız-esapsız azap, meşaqatlar ketirip, bütün dünyada barışıqqa telüke oldı.

Suçsız, günahsız öldürilgen millionlarnıñ ruhları bugün bizlerge ümüt ile baqalar, çünki devlet akimiyeti başına kreml cellâtları tarafından ketirilgen iradesiz yolbaşçılar bizni demokratik Avropadan qoparmağa ve Ukrainanı öz tesiri altına almağa tırışalar.

Men Avropa devletleri, Amerika ve Kanada diplomatları ve siyasiy erbaplarına Meydanımızğa ve Ukrainanıñ Avropa yönelişine destek köstergenleri içün teşekkür bildirem. Bunı kibi de sabıq sovet cumhuriyetlerinde, şu cümleden Rusiyede, sağ qalğan kommunist rejimi mahbüslerine Yevromaydanğa qoltutqanları aqqındaki beyanatlarını kütleviy matbuat vastalarında tarqatqanları içün teşekkür bildirem.

Şusı quvançlı ki, bu Meydanda bulunğan insanlarnıñ büyük qısmını gençler, studentler teşkil ete. Demek, Ukrainanıñ kelecegi işançlı qollarda.

Yaşlarımızğa şan-şerefler!  Yaşasın Ukraina!