Meclis reisi çeşit milletlerge mensüp oqumış gençler yaqın kelecekte Qırımğa bugünki siyasetçi ve idarecilerden daa yahşı hızmet eteceklerine emin

17 Dekabr 2013

Dekabr 17 künü Aqmescitte Ukrain muzıka teatrinde istidatlı balalar içün Süren litseyiniñ 20 yıllığına bağışlanğan tantanalı merasim ötkerildi.

Faqat Qırımda degil de, belki Ukrainadaki eñ ileri ve kreativ oquv müessiselerinden biriniñ bayramına 800-den ziyade musafir keldi. Olarnıñ arasında Milliy Meclis reisi Refat Çubarov, Qırım müendislik-pedagogika universitetiniñ rektorı Fevzi Yaqubov, cumhuriyet akimiyetiniñ vekilleri, Süreñ litseyiniñ direktorı Memet Kangiyev ve ocaları em de çoqtan-çoq talebeleri bar edi.

“Başarı tesadufen olmaz” – litsey bayramınıñ musafirlerini böyle slogan ile qarşıladılar. Meclis reisi Refat Çubarov litseyni 20 yıllığınen hayırlar eken Qırımnıñ belli bir sebeplerden ötrü çoqmilletli, çoqdinli, çoq medeniyetli cemiyeti barışıq içersinde yaşamağa istese bugünki siyasetçilerniñ yerine kelecek yaş nesilge ayrıca diqqat bermek kerekligini qayd etti.

“Bizim borcumız biri-birimizge sayğı köstermek ve qoltutmaqtır, – dedi Meclis reisi. – “İlerilev birlikte” kibi belli şiarnı tekrarlaybermek yeterli degil, onı ömürge keçirmekniñ vaqtı çoqtan keldi”.

R.Çubarov emin ki, milletlerara barışıq ve özara sayğı-ürmet, qomşunıñ tiline ve medeniyetine sayğı sadece bayram künlerinde kösterilmeden, cemiyetniñ normasına çevrilmelidir. “Biz biri-birimizge bir şekilde doğru adımlamaq, öz aqlarımız sırasında qomşularımız ve diger millet insanlarınıñ da aqlarını tanımalımız. Qırımda böyle vaziyetni meydanğa ketirebilsek, epimiz raat-raat yaşap başlarmız”, – dedi Meclis reisi

Devlet ve cumhuriyet akimiyeti organlarınıñ vekillerine hıtap eterek, Meclis reisi Sürendeki litseyge destek bergenleri içün teşekkür bildirip böyle teraqqiyatqa Qırımnıñ er bir mektebinde irişilmesi kerekligini qayd etti. “Bizim balalarımız musaviy aq saibi olaraq, ana tilinde tasil almaq imkânına da malik olmalılar, – dedi Meclis reisi ve akimiyet organlarına bir kereden beş tilde ders berilgen Süren litseyiniñ tecribesini Qırımnıñ er bir mektebinde tadbiq etmege çağırdı.

Meclis reisi bunıñ kibi de, gimnaziya bayramında Süren litseyinde oqudıqları zaman tanış olğan Yaşlarnı rastketirgenini ğurur ile qayd etti. “Bugün artıq olar endi küçlü ve şekillengen, yarın er saada bizim yerimizge kelecek şahıslardır, – dedi R. Çubarov. – Qırımda böyle oqumış, bilgili, em rus, em ukrain, em qırımtatarı olğan gençler çoqça olması kerek. Çeşit milletlerge mensüp oqumış gençler yaqın kelecekte Qırımğa bugünki siyasetçi ve idarecilerden daa yahşı hızmet eteceklerine eminim”.

Öz nevbetinde Süren gimnaziyasınıñ direktorı Memet Kangiyev mezunlarnıñ sayısı 600-nı artıp, bugünde-bugün olarnıñ bir çoqları dünyanıñ çeşit yerlerinde reberlik ve yüksek ihtisaslı vazifelerde çalışqanları aqqında ayttı.

“20 yıl içinde mektebimiz mürekkep bir yolnı keçti, amma men yüzümizge qarşı esken ruzgârdan ve tırmaşmaq zoruna qaldığımız tik qayalardan minnetdarım, çünki tek qıyınlıqlarnı yeñerek bugün elde ettigimiz yeñişke irişebildik” – dedi M. Kangiyev.

Memet Kangiyev şunı da qayd etti ki, Süren litseyiniñ hususiyeti eki tilli, bugün ise çoqtilli tasil ve oqutuvnıñ yüksek keyfiyetinde degil de, oquv ceryanınıñ temeline qoyulğan felsefede yani insanğa nisbeten sevgi, sayğı ve maneviyliktedir”, – dedi gimnaziya direktorı ve litsey ocaları, talebeleri, mezunları, çoq yıllar devamında litseyge yardım etip kelgen ana-babalarğa teşekkürini bildirdi.

Malümat içün: Süren mektep-internatı 1993 senesi açıldı. O vaqıtta onıñ adı “İstidatlı balalar içün 1-111 dereceli mektep-internat” olıp, on sekiz yıl içinde adı üç kere deñiştirildi.

Müessiseniñ birinci müdiri Huseyin Aydın oldı, 1996 senesi o zaman direktornıñ oqutuv-terbiyelev işi boyunca muavini Memet Kangiyev direktor etip tayinlendi.

Birinci oquv yılı gimnaziya 54 talebe qabul etip, olarnıñ episi dünyanıñ çeşit universitetlerine, cümleden Türkiye, Poloniya, Rusiye, Amerikada, oqumağa kirdiler. Gimnaziya talebeleri “INEPO”, “ACCELS” kibi yarışlarda, olimpiada ve konkurslarda ğalip çıqtılar, Qırım Nazirler Şurasınıñ burslarını qazandılar, altın ve kümüş medal saipleri oldılar.

2007 senesi gimnaziyağa Bütük ukrain seviyesindeki eksperimental oquv müessisesi statusı berildi.

2009-2010 senelerde gimnaziya eki defa “Flagman osviti i nauki Ukraїni” entsiklopediyasına kirsetildi.

2013 yılğa kelip gimnaziya 600-den ziyade talebe oquttı. Mezunlarnıñ episi aliy oquv yurtlarında, 90 fayızı ise devlet büceti esabına oqudılar.
Gimnaziya ocalarınıñ bir çoqları birinci kününden çalışıp başladı ve bugünge qadar talebelerni oqutuv işini devam etmekteler.