Ahtem Çiygoz: Halqara forum akimiyetniñ qırımtatar halqı vekâletli organına nisbeten ayın-oyunlarına soñ çeker

Dekabr 15 künü Meclis yolbaşçıları ve Meclis idare ve hızmetleri yolbaşçılarınıñ Qarasuvbazar regionında Qurultay delegatları, maalliy milliy idare organlarınıñ reisleri, yerli şuralarnıñ deputatları ve musulman cemiyetlerniñ reislerinen birlikte toplaşuvları olıp keçti.

Onda Meclis reisiniñ muavinleri Zaur Smirnov, Nariman Celâl ve Ahtem Çiygoz, Meclis idare ve hızmetleriniñ reberleri – Seydamet Yağyayev, Gayana Yüksel, Bekir Mamutov, Emine Avamileva, Meclis azaları Dinara Seytgaziyeva, Şevket Qaybulayev, Eskender Bariyev, Qurultay Teftiş komissiyasınıñ başı Ali Özenbaş, bunıñ kibi de Qarasuvbazar regional meclisniñ reisi Mustafa Asaba iştirak ettiler.

Meclis reisiniñ muavini Zaur Smirnovnıñ haber bergenine köre, regionlarara toplaşuvda Sudaq regionı vekilleriniñ de iştiraki közde tutulğan, lâkin Sudaq regionı delegatsiyasınıñ Kiyevge Yevromaydanğa ketkeni sebebinden Sudaqta ayrıca toplaşuv yapmaq qararı alınğan. Toplaşuvnıñ künü keççe haber etilecek.

Bundan da ğayrı Zaur Smirnov şunı da bildirdi ki, Meclis reisi Refat Çubarovnıñ da dekabr 15-te Kiyevdeki “Halq toplantısında” çıqışı munasebetinen o, Qarasuvbazardaki toplaşuvda iştirak etip olamadı, amma toplaşuv iştirakçilerine mahsuldar çalışmalar tileklerini bildirdi.

“Meclis reisi qırımtatar halqı adından Ukraina vatandaşlarınıñ Yevromaydandaki tınç aktsiyasında çıqışta bulunacaq, – dedi Smirnov. – Yaqın zamanda R. Çubarov Qarasuvbazar regionını mıtlaqa ziyaret etecek”

Körüşüv devamında Meclis idare ve hızmetleriniñ reberleri Qarasuvbazar regionı milliy idare organlarınıñ vekillerini öz bölükleriniñ faaliyeti ve birinci nevbettteki vazifelerinen tanış ettiler.

“İşni tekmillemek ve qoyulğan maqsadlarnı kerçekleştirmek içün bizler daima sıqı dialogda bulunmalımız, Milliy Meclis ve onıñ regional em de yerli vekâletliklerinen munasebetlerni qurmaq kerekmiz”, – dep qayd ettiler çıqışlarında Meclis idare ve hızmetleriniñ reberleri

Cümleden Gayana Yüksel regional meclis reislerine Milliy Meclisniñ er bir idaresinen alâqa içün mesülietli hadimlerni tayinlemek ve daima bağda bulunmaqnı ve böyleliknen yerli meclislerniñ faaliyeti ve semetdeşlerniñ ömürinde olıp keçken vaqialar aqqında haber berip, kütleviy matbuat vastalarına informatsion sebep yaratuvda aktiv olmaqnı tevsiye etti.

Meclis reisiniñ muavini Ahtem Çiygoz Qarasuvbazar regionı vekillerini dekabr 10-da ötkerilgen umumqırım mitingine qoltutqanları içün teşekkürini bildirdi. “Bu künü biz qırımtatar halqı sürgünliginiñ 70 yıllığı aldından Meclis yolbaşçılığında umumqırım tedbirler başlanmasını ilân ettik, – dep qayd etti Çiygoz. – Bizim esas talaplarımız akimiyet içün yañılıq degil.

Bular – halqımıznıñ aqlarını ğayrıdan tiklev, Yerleştirüv programmasınıñ finansirlenmesi, Meclisniñ Ukrainanıñ uquqiy alanına kirsetilmesi ve 2014 senesi mayıs 18-ge qadar Halqara forumnıñ keçirilmesidir. Halqara forum ise akimiyetniñ qırımtatarlarnıñ vekâletli organına nisbeten ayın oyunlarına soñ noqtanı qoyar”.

Öz nevbetinde Qarasuvbazar regionınıñ vekilleri em Milliy Meclis, em Qarasuvbazar regional meclisniñ operativ ve semereli çalışması istegini bildirdiler. “Biz Meclis idare ve hızmetleri reisleriniñ semetdeşlerimiznen muntazam sürette körüşüvler keçirmek, yapılğan işniñ esabatını bermek ve kelecekke planlarnı muzakere etmek zarurlığı aqqındaki fikirlerine qoşulamız, – dediler Qurultay delegatları, Qarasuvbazar regionı yerli şuralarnıñ deputatları. – Biz Milliy Meclis ve regional meclis tarafından keçirilgen epsi tedbirlerde iştirak etmege azırmız”.

Hatırlatamız ki, nevbetteki kenişletilgen iş toplaşuvı dekabr 21-de Keriç, Kefe şeerleri ve Lenin rayonında ötkerilecek.