Meclis reisiniñ muavinleri Zaur Smirnov ve Ahtem Çiygoz Qarasuvbazarda cami qurulayatqan yerni ziyaret ettiler

15 Dekabr 2013

2013 senesi dekabr 15 künü Meclis yolbaşçılarınıñ regionlarara toplaşuvları bitken soñ Meclis reisiniñ muavinleri Zaur Smirnov ve Ahtem Çiygoz Bekir Çoban-zade fondınıñ tesisçisi Resul Velilâyevnen beraber Qarasuvbazarda cami qurulayatqan yerni ziyaret ettiler.

Belli ki ağa-qardaş Resul ve Remzi Velilâyevler Qarasuvbazarda şeer camisini qurmaq teşebbüsinen çıqıp, oktâbr 16 künü Qırım musulmanlarınıñ müftiyi acı Emirali Ablayev, Meclis yolbaşçıları ve qırımtatar cemaatçılığınıñ iştirakinde caminiñ temeline ilk taşı ve kapsula qoyuv tantanalı merasimi keçirilgen edi.

“Eger avalar yahşı olğan olsa, biz caminiñ qurucılığını endi bitirir edik, – dey Resul Velilâyev. – Amma, ep bir, biz iş suratına şikâyetlenmeymiz, professional qurucılarğa ve yardımı toqunğan er keske namuslı işleri içün öz teşekkürlerimizni bildiremiz”

Onıñ aytqanına köre, Qarasuvbazar şeer camisi 400-ge yaqın adamnı sığdıracaq, bundan da ğayrı cami yanında medrese ve caminiñ imamı içün eva qurmaq da közde tutula.