Meclis yolbaşçıları İçki, İslâm-Terek regionları ve Eski Qırım şeerindeki qırımtatarlarnıñ yerli milliy idare organlarınıñ reislerinen körüştiler

Dekabr 14 künü Meclis yolbaşçıları ve Meclis idare yolbaşçıları İçki, İslâm-Terek regionları ve Eski Qırım şeerindeki qırımtatarlarnıñ yerli milliy idare organlarınıñ reisleri, Qurultay delegatları maalliy şura deputatları ve musulman cemiyetleriniñ reislerinen beraber regionlarara toplaşuv keçirdiler.

Toplaşuvda Meclis reisi Refat Çubarov, Meclisniñ idare ve hızmetleriniñ yolbaşçıları – Zaur Smirnov, Ayder Acimambetov, Seydamet Yağyayev, Bekir Mamutov, Teyfuq Ğafarov, Meclis reisiniñ muavini Ahtem Çiygoz, Meclis azası İlmi Ümerov, Qurultay teftiş komissiyasınıñ başı Ali Özenbaş, Meclisniñ qırımtatar tilinde tasil ve qırımtatar tilini Qırımnıñ devlet ve cemaat ömürine tadbiq etüv meseleleri boyunca idaresiniñ azası İbraim Çegertma, bunıñ kibi de İçki ve İslâm-Terek regional meclisleriniñ reisleri Ekrem Abdulvatov ve Abmecit Suleymanov iştirak ettiler.

Toplaşuvnıñ başında Meclis reisi Refat Çubarov Ukrainadaki içtimaiy-siyasiy vaziyet aqqında aytırken, soñki künlerde olıp keçken vaqialar Ukrainanıñ yevrointegratsion yönelişine em içeride, em tışta qarşı çıqqanlar mevcut olıp, insanlarnıñ arasında doğrudan-doğru dava çıqarmağa azır olğanlarını tasdiqlağanını ayttı.

Toplaşuv iştirakçileri de öz tarafından tasdiqladılar ki, regionlardan, şu cümleden Qırımdan da, Yevromaydandaki tınç aktsiya iştirakçilerine qarşı qoymaq içün akimiyetke boysunğan ve aqları tölengen insanlarnıñ Kiyevge zorluqnen yollanılğanı közetile.

Refat Çubarov Kiyevge Yevromaydan aktsiyasına qoltumaq içün göñülli ketken semetdeşlerimiz öz areketlerini Meclis ile, bivasta Meclis reisiniñ muavini Ahtem Çiygoz ile añlaşqanı alda yapmalarını rica etti. Onıñ aytqanına köre bu, akimiyet partiyası tarafından teşkil etilgen mitinglerde qırımtatar halqı adından çıqışta bulunğan şahıslar tarafından yapılacaq provokatsiyalardan çetleşmek imkânını berir.

Regionlarara toplaşuv devamında Meclis reisi regional ve yerli meclis vekillerini öz işlerini mükemmelleştirmege, semetdeşlernen muntazam sürette körüşüvler keçirmege, olarnı yapılğan işlerden haberdar etmege ve neticelerni talil etmege çağırdı. ” Qırımtatar milliy idare organlarınıñ işine semetdeşlerimiz kesken qıymet maqsad ve vazifelerni eda etüvde siltem olmalıdır, – dedi Refat Çubarov. – 2013 senesine plan tiziñiz, planlarıñıznı mıtlaqa semetdeşlerimizge bildiriñiz, bu ise insanlarnı milliy ve lokal meselelerniñ çezimine celp eter”.

Meclis idareleri ve hızmetleriniñ yolbaşçıları faaliyetleriniñ esas vazifeleri ve yönelişleri aqqında ayttılar.

Regional meclislerniñ vekilleri ise öz tarafından milliy sınıflarnı açmaqta zorluq çekkenlerini bildirip, Meclisniñ mesül hadimlerinden bu meseleni müsbet çezüvde professional yardım ve qoltutmalarını rica ettiler.

“Ana-babalar ariza yazalar, balalar da öz ana tili ve medeniyetini ögrenmege isteyler, amma bir sıra umumtasil müessiselerinde insanlarnıñ qanuniy aqları bozulmasına rastkelemiz”, – dep qayd ettiler yerli meclis azaları.

Toplaşuvda çıqışta bulunğan Qurultay Teftiş komissiyasınıñ reisi Ali Özenbaş ve Meclisniñ medeniyet, tarih ve maneviy ömür meseleleri boyunca idaresiniñ başı Bekir Mamutov semetdeşlerimizni milliy neşirlerge abune oluvda aktiv olmağa çağırıp, Ukraina qanunlarına esaslanaraq cumhuriyet idareleri ve epsi şuralarnıñ adları kösterilgen işaretlerniñ ana tilinde yazılmasını teşebbüs etmege çağırdılar.

Bundan da ğayrı Ali Özenbaş milliy idare organlarınıñ vekillerine bücetni şekillendirmege tırışmaq ve yerlerde leyhadarnı amelge keçirüvde mesülietli olmaqnı tevsiye etti.

İçki ve İslâm Terek regionları meclisleriniñ reisleri böyle toplaşuvlarnıñ müimligini qayd eterek, olar yañlışlarnı tüzeltmek, fikir paylaşmaq ve alınğan malümatnı işniñ keyfiyetini yükseltmege imkân bergenini ayttılar.

Hatırlatamız ki, kelecek kenişletilgen seyyar iş toplaşuvı 2013 senesi dekabr 15-te Qarasuvbazar ve Sudaq regionlarında olacaq.