Felâketke oğramaqnıñ ögüni almalımız!

14 Dekabr 2013

Ukraina ve biz, çoqmilletli ukrain halqı, kergin künlerni yaşamaqtamız!

Ukrain cemiyetiniñ büyük bir qısmı Avropa medeniyetine, Avropa siyasiy ve iqtisadiy cemiyetine qatılmağa tırışuvı, angisi ki, cümleden, ayrı insanlar ve halqlar, dinler arasında zemaneviy umuminsaniy munasebetleriniñ standartlarını tadbiq etüvni közde tuta, Ukrainanıñ yevrointegratsiya areketlerine em içeride, em tışta qarşı çıqqanlarnıñ şiddetli tirençine oğradı.

Bugün açıq-aydın körüne ki, Ukrainanıñ yevrointegratsiyasına qarşı çıqqanlar insanlar arasında qavğa çıqarmağa azırlar. Bu maqsadnen bütün memleket boylap, şu cümleden Qırım Muhtar Cumhuriyeti de, akimiyet organları qolastındaki adamlarnnı zorlap seferber etmek ve Kiyevge yollamaq kibi misli körülmegen areket yapılmaqta. Olarnıñ ögüne Yevromaydanda tınç aktsiya iştirakçilerine qarşı turmaq vazifesi qoyuldı.

Yaqın künlerde Kiyevde Ukraina yevrointegratsiyasına qarşı küçlerniñ areketleri aqibetinde facialı adiseler olmasınıñ ihtimalı bar.

Aqibetleri em Ukraina, em Avropa telükesizliginiñ sistemi içün felâketli olabilecek facianıñ ögüni almaq maqsadında Yevromaydandaki tınç aktsiya iştirakçileri arasında Ukrainada akkreditatsiya etilgen diplomatik vekâletlikler ve missiyalarnıñ temsilcileri, jurnalistler ve çeşit devletlerden kelgen parlament azalarınıñ bulunması pek müimdir.

Eminim ki, birlikte areket eterek biz Ukraina vatandaşları tınç aktsiyaları iştirakçilerine nisbeten er angi zulum ve fesatnıñ ögüni alıp olurmız.

Refat  Çubarov,
Qırımtatar halqı Meclisiniñ reisi

2013 senesi dekabr 14