Qırım Yuqarı Şurası Qırım sakinleri tarafından saylanğan vekâletli organ olaraq deyerlik örz faaliyetini toqtattı

12 Dekabr 2013

Bu aqta Meclis reisi Refat Çubarov ATR televizion kanalına Qırım Yuqarı Şurasınıñ 2013 senesi dekabr 11-de yapqan videomuracaatını izaatlarken bildirdi.

“Qırım Yuqarı Şurası ükümranlıq yapqan “Regionlar partiyası” firqasınıñ devamıdır ve Qırım sakinleri içün yapılğan videomuracaat yalıñız Qırımda degil, men bellesem, bütün dünyağa, hususan rus tilini bilgen yerlerinde külkü oldı”, – dedi R. Çubarov. Aynı zamanda o, şunı da qayd etti ki, külkü artında bunıñ kibi beyanatlar taşığan telükeni de körebilmek kerek.

Onıñ fikrince telüke şunda ki, Qırım Yuqarı Şurası Prezidiumınıñ azaları olğan 13 adam Yuqarı Şura reisi V. Konstantinovnıñ reberliginde “kendilerini açıqtan-açıq bir (!) etnik gruppanıñ qorçalayıcısı olaraq ilân etip, Qırımnıñ diger sakinleriniñ menfaatlarını esapqa almadılar. Albu ki telükeni özleri uydurdılar”.

“Qırımnı Ukrainada siyasiy inqıraz körünişlerinden qorçalamaq kerek degil, inqıraz meselesini kerek adamlar çezerler, – dey Meclis reisi. – Yani Ukraina Prezidenti, muhalifet ve Qırım Yuqarı Şurasındaki siyasetçilerge köre daa ziyade itibarlı siyasetçiler bar”.

Meclis reisi, Qırım Yuqarı Şurasında “Qurultay-Ruh” deputat firqasınıñ başı Qırım parlamentiniñ yolbaşçısına çoqmilletli Qırım sakinleriniñ ögünde turğan meselelerniñ çeziminen oğraşmasını tevsiye etti. “Lâkin olar bunı yapmağa qadir degiller, şunıñ içün de kendilerine nisbeten yazıqsınuv duyğusından ğayrı iç bir tesiri olmağan bu kibi beyanatlarnı yapalar”.