Regional ve yerli meclisler qırımtatarlar milliy idare sisteminiñ temelidir

2013 senesi dekabr 11 künü Meclis yolbaşçıları ve idare reberleriniñ Aluşta ve Yalta regionlarındaki Qurultay delegatları, yerli milliy idare organlarınıñ reisleri, yerli şuralarnıñ deputatları ve musulman cemiyetleriniñ regionlarara toplaşuvı keçirildi.

Toplaşuvda Meclis reisi Refat Çubarov, Meclisniñ idare ve hızmetleriniñ reberleri – Zaur Smirnov, Nariman Celâl, Dilâver Akiyev, Emine Avamileva, Seydamet Yağyayev, Bekir Mamutov, Qurultay teftiş komissiyasınıñ başı Ali Özenbaş, Meclis azası, “Avdet” gazetasınıñ baş muarriri Şevket Qaybullayev, Meclis azası Abduraman Egiz, Yalta ve Aluşta regional meclisleriniñ reisleri Üsein Çapuh ve Enver Arpatlı iştirak ettiler.

“Yapıcı dialog ve qoyulğan vazifelerniñ mesülietli edası qırımtatar milliy idare organları faaliyetiniñ baş yönelişleridir”, – dedi toplaşuvnıñ başında Meclis reisi Refat Çubarov, regionlarara toplaşuvnıñ maqsadını seslendirerek. İşniñ baş meseleleri ve yönelişleri aqqında toplaşuv iştirakçilerine Meclisniñ idare ve hızmetleriniñ reberleri añlattılar.

“Regional ve yerli meclisler qırımtatarlar milliy idare sisteminiñ temelidir”, dep qayd ettiler öz çıqışlarında Meclisniñ idare ve hızmetleriniñ reberleri. – Regional meclisler özleri yaşağan yerler tarihını populârlaştıruv oğrunda yapqan tedbirlerni aydınlatuvda, halqımıznıñ inkişafı saasında maqsad ve vazifelerni amelge keçirüvde biri-birimizge yardımcı olmaq kerekmiz”.

Cümleden, bir çoq toplaşuvlarnıñ baş meselesi olğan milliy sınıflar açılmasını muzakere etkende Meclis reisi Refat Çubarov ve Meclisniñ qırımtatar tilinde tasil ve qırımtatar tilini Qırımnıñ devlet ve cemaat ömürine tadbiq etüv meseleleri boyunca idaresiniñ başı Emine Avamileva bu meseleniñ müsbet çezilmesine em ana-babalar, em ana tilinde tasil almaq aqqını bergen qanun regional meclislerniñ baş yardımcıları olğanını qayd ettiler.

Toplaşuv iştirakçileri Meclis ve regional meclislerniñ devlet ve cumhuriyet akimiyetinen munasebeti, semetdeşler toplu yaşağan qasabalarda obyektlerni finansirlev istiqballeri, regional ve yerli meclislerniñ 2014 senesine iş planları, bunıñ kibi de Aqmescitte Büyük cami qurucılığı meselesini muzakere ettiler.

Cümleden, Körbek köyü şurasınıñ deputatı Amet Ramazanov ve Uskut köy şurasınıñ deputatı Sabri İslâmov Aluşta regionında qırımtatarlar toplu yaşağan yerlerde elektrik ve suvnen teminlev problemlerini seslendirip, mesülietli cumhuriyet organları ve cümleden Milletler komiteti bu saada iç bir iş yapmağanlarını qayd ettiler.

“İnsanlarnı er yıl vadelernen sıylaylar, muracaatlarımız cevapsız qalmaqta, – dep şikâyet ettiler deputatlar. – Bundan da ğayrı zarur turmuş şaraitleri olmağanı alda adamlarnı Krımenergo ve Krımvodokanal teşkilâtlarınen kösterilmegen hızmet aqqında añlaşma imzalamağa mecbur eteler”.

Meclis reisi adliye idaresiniñ reberine vaziyetni tafsilâtlı ögrenip, ükümet organlarınen olğan yazışmalar esasında tevsiyelerni azırlamaqnı avale etti ki, bu tevsiyeler cumhuriyetniñ ait nazirlikleri ve idarelerniñ yolbaşçılarınıñ ögünde problemanı kesen-kes qoymağa esas olacaq.

Refat Çubarov toplaşuv iştirakçilerine şunı bildirdi ki, bugünde-bugün Qırımtatarlarnı ve sürgünlikke oğratılğan diger şahıslarnı yerleştirüv boyunca devlet programması deyerlik finansirlenmey ve tsifir noqtasına ketirildi. Meclis reisiniñ aytqanına köre keçenlerde Qırım yolbaşçılarınen körüşkende o, Qırım ükümetine Ukraina içtimaiy nazirliginiñ Ukraina Devlet Bücetine 2014 senesine Qırımtatarlarnı ve sürgünlikke oğratılğan diger şahıslarnı yerleştirüv maqsadlarına 197 million ayırmaq teklifine qoltutmaqnı tevsiye etken, amma teklif alâ daa cevapsız qalmaqta. boyunca devlet programması

Aluşta ve Yalta regional meclislerniñ reisleri çıqışta bulunıp, böyle kenişletilgen toplaşuvlar milliy idare organlarınıñ işi içün pek zarur olğanını ve meselelerni çezüvde fikir paylaşmaq imkânını bergenini ayttılar.

Aynı zamanda E.Arpatlı ve U.Çapuh şunı qayd ettiler ki, olarnıñ reisligindeki meclisler ellerini qavuştırıp oturmadan bir sıra yönelişlerde ibretli işler yapmaqtalar.

Hatırlatamız ki, nevbetteki kenişletilgen toplaşuv dekabr 14 künü saat 11-de Seytler, İçki ve İslâm-Terek regionlarında olacaq.