Meclis azadarı ve Müftiyat milliy areket iştirakçisi Lütfi Bekirovnı 85 yaşınen hayırladılar

06 Dekabr 2013

Dekabr 5 künü Qırımtatar halqı milliy areketiniñ veteranı Lütfi Bekirov 85 yaşını toldurdı. Qurman rayonınıñ Nekrasovo köyünde Lütfi ağa ailesinen yaşağan evge onı hayırlamaq içün Qırım musulmanlarınıñ Müftiyi Emirali Ablayev, onıñ muavini Ayder İsmailov, Meclis reisiniñ muavini Ayder Acimambetov, Kâtibiyet başı Dilâver Akiyev, Meclisniñ tış alâqalar bölüginiñ başı Ali Hamzin, Meclis azası Şevket Kaybullayev, Qurultay Merkeziy saylav komissiyasınıñ reisi Zair Smedlâyev ve milliy areket veteranları Zevcet Kurtumerov ve Kurtseit Abdullayev keldiler.

Musafirler Lütfi Bekirovğa halqımıznı vatanğa qaytaruv oğrundaki areketke qoşqan issesi içün teşekkür bildiripr, yubilârğa sağlıq tilep, aile ve yaqınlarına eyi tileklerde bulundılar.

Lütfi Bekirov oña kösterilgen böyle sayğı-diqqattan ğayet tesirlenip, musafirlerni qoqulı qave ve tatlılarnen sıyladı.

Malümat:  Lütfi Bekirov 5 dekabr künü 1928 senesi Bağçasaray rayonındaki Eski-Yurt köyünde Bekir ve Üriye Aliyevler ailesinde dünyağa keldi. Cenk vaqtında Lütfi faşistlerge qarşı vereqalar darqatqan. 1944 senesi aprel ayında Qırım faşistlerden azat etildi ve yerli sakinlerniñ evlerine sovet askerlerini yerleştirdiler. Lütfiniñ babasınen dost olğan sovet subayı sürgünlik aqqında haber etip, kerek şeylerini toplamağa imkân berdi. Lütfi ailesinen 12 gece-kündüz sasıq vagonlar içinde ketip. Bekabad vilâyetindeki bir qışlaqqa ketirildi ve evel mahbüsler tutulğan baraqlarda yerleştirildi. 1964 senesi

Lütfi Taşkent politehnika institutınıñ “Tezya ve aletler” fakultetine kire. Bekabadda o Cebbar Akimovnen tanış ola ve onı özüniñ ocası dep saya. Özbekistanda teşebbüsçi gruppalar, maalle komitetleri teşkil oluna. Olarnıñ vazifesi delegatlarnı yollamaq içün para, halq vesiqaları altına imzalarnı toplav ve ealini olğan vaqialardan haberdar etmekten ibaret edi. İşte o zaman Lütfi ait organlarnıñ nezareti astına tüşe. 1966 senesi oktâbr ayında Lütfi Bekirovnı tañda evine kelip yaqalay ve 15 sutkağa qapaylar. Qırımtatarlarnıñ narazılıq mitingine toplanğan 500-den ziyade insan içinden organlar 7 adamnı seçe ve olarnı “toplaşuv teşkilâtlandırğanlarında” qabaatlap çeşit müddetke üküm eteler.

1968 senesi Lütfi ağa verbovka boyunca Qırımğa qayta. Bir qaç qırımtatar qorantasını Nekrasovo köyüne yerleştireler. Olar kündüz devletke, aqşam ise öz azbarında çalışalar ve milliy areketni de devam eteler. Lütfi Bekirov, İrfan Rustemov ve İzzet Usta köyde teşebbüsçi gruppa tizeler. Qırımda yaşağan qırımtatarlarğa tanışlar, aqrabalar kelip, eV ve iş qıdıralar. Amma yerli akimiyet olarğa nisbeten zulumlıq yapa. Ağası İzzetniñ yanına kelip, boş evde yerleşken Sıddıh Ustanı milisler avtomat ve köpeklernen quvıp çıqaralar. Olarnı qorçalamağa kelgen 20 adam yaqalana. Acele mahkeme yapalar.

1979 senesi Lütfi Bekirov 4 yılğa, İzzet Usta – 3 yılğa ve Seyran Hırhara 3 yılğa azatlıqtan mahrum etileler. Bundan evel 1972 senesi Lütfi Bekirov onıñ azbarına kirip şamarlağan sarhoş adamğa şamarnen cevaplanğanı içün 2,5 yılğa üküm etilgen edi. Asılında bu planlaştırılğan bir fesat edi. O zaman Lütfi Bekirov Çernovtsıda yer altında çalıştı.

Qırımğa köçip kelgen semetdeşlerge Lütfi ağa elinden kelgeni qadar yardım etti. Halq meselesine dair bütün aktsiya ve tedbirlerde faal qatnaştı. Nekrasovo köyünde cami qurucılığınıñ iştirakçilerinden biridir.

Bugünde-bugün Lütfi Bekirov milliy areketteki safdaşları, eki yıl evelsi rahmetli olğan 60 yıllıq ömür arqadaşı Gülnarnı hatırlap yaşamaqta. Olar beraber üç evlât östürdiler. Evlâtları ise 8 torun ve 6 torunçe bağışladılar.