Meclis azaları: Biz Qırım sakinlerini Halqara insan aqları kününe bağışlanğan Bütünqırım mitingge qoltutmağa çağıramız

06 Dekabr 2013

2013 senesi dekabr 10 künü Aqmescitniñ merkeziy meydanında Halqara insan aqları kününe bağışlanğan Bütünqırım miting ötkerilecek. Mitingniñ keçiri lmesi Ukraina qanunlarına muvafıq tertipte kelişildi. Bu aqta dekabr 6 künü matbuat konferentsiyasında Meclis reisiniñ muavinleri Zaur Smirnov ve Nariman Celâl, bunıñ kibi de Meclisniñ adliye idaresiniñ başı Teyfuq Ğafarov bildirdiler.

Meclis reisiniñ muavini Nariman Celâl hatırlattı ki İnsan aqları boyunca deklaratsiya qabul etilgen künü 1950 senesinden itibaren dünyanıñ çeşit yerlerinde aktsiya ve davasız mitingler keçirilmekte.

“Qırımtatar halqı milliy areketiniñ bir çoq iştirakçileri SSSRde uquqqorçalav areketine de qoşuldılar, şunıñ içün de insan aqları içün küreş qırımtatarlar içün öz aqlarınıñ ğayrıdan tiklenmesi oğrundaki küreş oldı”, – dedi Nariman Celâl ve qayd etti ki, Meclis Halqara insan aqları kününe pek büyük diqqat ayıra ve er yılı dekabr 10 künü Aqmescitte Bütünqırım mitingi ötkerilmekte.

Matbuat konferentsiyasınıñ iştirakçileri Meclis adından Qırım sakinlerine muracaatta bulunıp, Halqara insan aqları kününe bağışlanğan Bütünqırım mitingine qoltutmağa çağırdılar.

“Biz Qırım sakinlerini, milletleri ve dinlerinden qatiy nazar, Ukraina ükümeti ve halqara cemaatçılıqnıñ yüzüne baqıp Ukrainada insan aqlarını qorçalav saasındaki vaziyetniñ yaramay olğanını açıqtan-açıq aytmağa çağıramız, – dedi N. Celâl. – Demek biz böyle vaziyetnen razı olmağanımız ve öz aqlarımını mahkemede ya da bugün Ukrainada olğanı kibi öz şeerlerimizniñ soqaqlarında qorçalamağa azırlığımıznı bildirmek kerekmiz”.

Matbuat konferentsiya iştirakçileriniñ aytqanlarına köre dekabr 10-da olacaq Bütünqırım mitingine Ukrainadaki içtimaiy-siyasiy vaziyet özüne has bir özgünlik bere. “Ukrainanıñ epsi vatandaşları Kiyevde ve diger şeerlerde bir aftadan ziyade vaqıttan berli belli bir talaplarnı ögge sürgen Yevromaydan davasız narazılıq aktsiyaları keçirilgenini bileler, – dep qayd ettiler Meclis azaları.

Belli ki, Meclis öz beyanatında bu aktsiyalarğa qoltutqanını bildirip, memleketimizniñ yevrointegratsiya aqqındaki qanunlarınıñ edasını teminlep olamağan Nazirler Kabinetiniñ istifağa ketmesi, Ukraina Yuqarı Şurasına nevbetten tış saylavlar keçirilmesini talap etti”.

Meclis reisiniñ muavini Zaur Smirnov olacaq Bütünqırım mitingi aqqında aytırken, bu künlerde Kiyevde olıp keçeyatqan OSCE azası olğan devletlerniñ sammitinde esasen insan ve halqlarnıñ aqlarını qorçalav aqqında laf ketkenini de ayttı.

“Dekabr 10 künü mitingde siyasiy-içtimaiy vaziyetten ğayrı Qırım tamır halqınıñ aqları aqqında meseleni de köterecekmiz, – dedi Z. Smirnov. Birinci nevbette biz Ukrainanıñ “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” qanunı qabul etilmesini tekrar talap etermiz”. Bunıñ kibi de o, Bütünqırım mitinginde Qırımtatar halqı sürgün etilgeniniñ 70 yıllığı arfesinde Halqara forum keçirilmesiniñ zarurlığı aqqında Ukraina yolbaşçıları adına Muracaat qabul etilecegini bildirdi.

“Asılında biz Ukraina ve Qırım akimiyetleri ve qırımtatarlarnıñ vekâletli organı arasında söyleşüvlerniñ esasını teşkil etecek müim meselelerni seslendiremiz”, – dedi Meclis reisiniñ muavini Zaur Smirnov.

Meclis adliye idaresiniñ başı Teyfuk Ğafarov şunı qayd etti ki, bir çoq semetdeşlerimiz Meclisniñ idare ve hızmetlerine muracaat ettigi meselelerniñ çezimi faqat halqnıñ statusı belgilengen ve ait qanun bazası, cümleden “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” qanun qabul etilgen soñ mümkün olur.

Teyfuk Gafarov emin ki, Ukrainada İnsan aqlarını qorçalav yalıñız laf tartışmasına çevrilmemek kerek. “Ukrainada vaziyet öyle ki, bir çoq meselelerni tek davasız aktsiyalarda iştirak etüvnen çezmek mümkün olur.

Soñunda Meclis reisi N. Celâl dekabr 10 künü olacaq miting Qırımtatar halqı sürgünliginiñ 70 yıllığına bağışlanıp aqiqatta Milliy Meclis imayesinde keçirilecek umumqırım tedbirlerniñ başlanğıçı olacaq, dedi