Meclis Prezidiumı Ukraina Nazirler Kabinetini istifağa çıqarmaq ve Ukraina Yuqarı Şurasına nevbetten tış saylavlarnı keçirmek talaplarına qoltuta

03 Dekabr 2013

Qırımtatar halqı Meclisiniñ

“Ukrainadaki siyasiy vaziyet aqqında” Beyanatı

Ukraina Nazirler Kabinetiniñ Ukraina ve Avropa Birliginiñ birleşmesi aqqında añlaşmanıñ imzalanmasına azırlıqnı toqtatıp turmaq boyunca alğan qararı ve Ukraina Prezidenti Şarqiy ortaqlıq Vilnüs sammiti vaqtında Añlaşmanı imzalamaqtan vazgeçkeni aqibetinde Ukrainada siyasiy inqıraz ep surat almaqta.

Yıllarca Avropa Birliginen yaqınlaşmaq yolunda ketkenlerini bildirgen Ukraina Ükümeti ve Prezidenti pozitsiyalarında bu qadar qarama-qarşı kardinal deñişmeler çoqmilletli Ukraina cemiyetiniñ ğadabı ve narazılığını qozğadı. Ukrainanıñ millionlarnen vatandaşları Ukrainanıñ Yevropa integratsiyasına qoltutmaq içün barışıq toplantı ve numayışlarnıñ iştirakçisi oldılar.

Ukrainanıñ resmiy akimiyeti cemiyetnen qonuşmaq yerine insanlarnıñ tınç aktsiyalarını darma-dağın etüv, iştirakçilerni köteklevnen cevaplandı. Noyabr 30 künü tañda bütün dünya Ukraina İçki işler nazirliginiñ mahsus küçleri Kiyevde Mustaqillik meydanındaki tınç aktsiya iştirakçilerini vahşiyane köteklegeniniñ şaatı oldı.

Studentlerge, umumen Ukraina qanunlarına muvafıq öz vatandaşlıq pozitsiyasını ifade etmege istegenlerge nisbeten iç aqlanılmağan zulum bütün Ukrainanı ayaqqa tursattı.

2013 senesi dekabr 1 künü Ukrainanıñ milliondan ziyade sakini Mustaqillik meaydanına ve Kiyevniñ merkeziy soqaqlarına çıqıp N.Ya. Azarovnıñ reisligindeki Ukraina Nazirler Kabinetini istifağa yollamaq, Ukrainanıñ Avropağa integratsiyası içün tınç aktsiya iştirakçilerini dağıtuvada suçlılarnı cezalamaqnı talap ettiler.

Ükümran partiya ve onıñ tarafdarları olğan kommunistler Ukraina Yuqarı Şurasında çoqluqnı teşkil etkenleri alda bu sefer de ukrain halqınıñ talabı ve iradesini diqqatqa almadılar. 2013 senesi dekabr 3-te Ukraina parlamentinde N. Azarov reisligindeki Ukraina Nazirler Kabinetiniñ istifağa yollanılması içün rey berilgende oylar yetişmedi.

Bugün Ukrainadaki vaziyet Ukrainanıñ territorial bütünligi ve mustaqilligini telüke altına taşlay. Vaqialarnıñ böyle ketişatına Ukraina regionlarınıñ bir qısmındaki yerli şuralar, şu cümleden ükümran partiyanıñ avalesi boyunca qarar alğan Qırım Yuqarı Şurasınıñ qararında vefqulade vaziyet kirsetmek ve Ukraina vatandaşlarınıñ tınç aktsiyalarını küç ile toqtatmaq talapları mevcut.

Ukraina öz mustaqilligini ilân etken künden başlap Ukraina territorial bütünligi ve mustaqilligine qoltutqan Qırımtatarlarnıñ aliy vekâletli organı olğan Qırımtatar halqı Meclisiniñ Prezidiumı memleket içindeki siyasiy vaziyetniñ inkişafından ve avtoritar rejim tadbiq etilmesinden ğayet kederlenmekte.

Milliy Meclis Prezidiumı ukrain cemiyeti çoqluğınıñ Ukraina ve Avropa Birliginiñ birleşmesi aqqındaki Añlaşma imzalanmasını talap etüvlerine qoltuta. Ukrainada muntazam siyasiy, uquqiy ve iqtisadiy islâatlarnıñ keçirilmesi tek Avropanıñ insan, milliy azlıqlar ve tamır halqlarnıñ aqları saasında standartları esasında mümkün olur.

Milliy Meclis Prezidiumı ep kerginleşmekte olğan qapa-qarşılıq devamında yol berilgen er angi zorbalıq areketlerini qaralamaqta ve Ukraina siyasiy ve içtimaiy ömür subyektlerini inqırazdan çıqmaqnıñ davasız yolunı tapmağa çağıra.

Bu vaziyette Milliy Meclis Prezidiumı Ukrainanıñ Avropa integratsiyası aqqında Ukraina qanunınıñ edasını teminlemegen Ukraina Nazirler Kabinetini istifağa çıqarmaq ve Ukraina Yuqarı Şurasına nevbetten tış saylavlarnı keçirmek talaplarına qoltuta

Refat Çubarov
Qırımtatar halqı Meclisiniñ reisi

2013 senesi dekabr 3