«Qurultay-Ruh» fraktsiyasınıñ başı Refat Çubarov: «Menim meslekdeşlerim Ukrainanı sarsıtuv telükeli yoluna çıqtılar»

02 Dekabr 2013

“Qurultay-Ruh” deputat fraktsiyasınıñ başı, Qırımtatar halqı Meclisiniñ reisi Refat Çubarov 2013 senesi dekabr 2 künü Qırım Yuqarı Şurasınıñ Ukraina Prezidentine vefqulade vaziyetni ilân etmesi boyunca muracaatı qabul etilmesini jurnalistlerge izaat etti.

“Bu artıq Qırım Yuqarı Şurası degil, bu – bugünyu ükümranlıq etken bütünukrain partiyalardan biriniñ teşkilâtıdır. Olar partiyanıñ nevbetten tış sessiya toplaşuvını keçirmek ve cenap Prezidentni vefqulade vaziyet kirsetmege çağırmaq avalesini yerine ketireler. Em olar bu vazifeni becerdiler, amma Qırım cemiyeti içün qaba ve havflı bir şekilde yaptılar. Olarnıñ bugünki açıqlamaları endi duşmaniy bir harakter taşımaqta. Bugün mında biz kördik ki, menim meslekdeşlerim Ukrainanı sarsıtuv telükeli yoluna çıqtılar. Ukraina keçrekten de telüke altında – territorial bütünligi telükesi altındadır. Zenaatdaşlarımnıñ çoqusı bunı añlamaq degil de, aksine Ukraina dezintegratsiya olmasına yardım eteler. Mencesine bu eñ büyük telükedir”, – dep qayd etti Refat Çubarov.

2013 senesi dekabr 2 künü Qırım Yuqarı Şurasınıñ nevbetten tış toplaşuvında bulunğan 78 deputattan 76-sı Ukraina Prezidenti Viktor Yanukoviçke muracaatta bulunıp, toqtamadan, er angi çare-tedbirler vastasınen cemaat tertip-nizamını tiklemege, eger ketişat bunı talap etse vefqulade vaziyet ilân etmege çağırdı.

“Qurultay-Ruh” fraktsiyasınıñ azaları Refat Çubarov ve Leonid Pilunskiy qarşı çıqtılar.