Qarasuvbazar regional meclisi 2013 senesi dekabr 10-da Halqara insan aqları kününe bağışlanğan Umumqırım mitinginde iştirak etecegini tasdiqladı

02 Dekabr 2013

2013 senesi noyabr 30 cumaertesi künü ötkerilgen Qarasuvbazar regional meclisiniñ toplaşuvında Qarasuvbazar regionınıñ yerli meclisleri, bunıñ kibi de Qırımtatar halqı Meclisiniñ azası, “Avdet” gazetasınıñ baş muarriri Şevket Qaybullayev ve Qurultay Teftiş komissiyasınıñ reisi Ali Özenbaş iştirak ettiler.

Ş. Qaybullayevniñ bildirgenine köre toplaşuv devamında 2013 senesi dekabr 10-da Halqara insan aqları kününe bağışlanğan Umumqırım mitingine azırlıq ve keçirilmesine dair meseleler muzakere etildi. Bundan da ğayrı milliy sınıflarnı inkişaf etüv ve milliy neşirlerge abune meseleleri baqıldı.

Qarasuvbazar regional meclisi 2013 senesi dekabr 10-da Halqara insan aqları kününe bağışlanğan Umumqırım mitinginde iştirak etecegini tasdiqladı.

Şunı da qayd etmeli ki, toplaşuvnıñ soñunda onda bulunğanlar 2014 senesine milliy devriy neşirlerge abune oldılar.