Meclis reisi Refat Çubarov Ukraina Avropa halqları ailesine mıtlaqa qoşulacağına emin

29 Noyabr 2013

Ukraina Avropa halqlarınıñ ailesinde oluvınıñ istegi Ukraina vatandaşlarını birleştirdi. Bu aqta Milliy Meclis reisi Refat Çubarov Aqmescitte noyabr 28-de olğan “Men Avropa Birligini seçem” aktsiyasında çıqışta bulunğanda bildirdi, dep haber eteler Qırım kütleviy matbuat vastaları.

Aqmescitniñ merkeziy meydanına Qırımda yaşağan çeşit millet vekilleri toplandılar. Aktsiya iştirakçileri arasında bulunğan çoq yaşlar, qırımtatar milliy areket veteranları, Meclis azaları, cemaat teşkilâtlarınıñ azaları ellerinde ukrain vei qırımtatar milliy bayraqları ve Avropa Birligi bayraqları ile Ukraina gimnini icra etip, “Ukraina – bu Avropa”, “Yanukoviç, imzala!” degen sözlerni ayttılar.

Miting devamında Qırımtatar halqı Meclisiniñ, Qırım cemaat teşkilâtlarınıñ azaları ve qırımtatar halqı milliy areketiniñ veteranları çıqışta bulundılar.

“Men insanlarnı neler birleştirip olur, dep çoq tüşünem. Ve niayet, vaziyetniñ özü bunı belgiledi. Men mında, meydanda çeşit tillerde qonuşqan ve belki de Qırımnıñ ağımdaki vaziyetine farqlı qıymet kesken, amma episi Ukraina serbest Avropa halqları ailesinde olmasını istegen insanlarnı ve bilhassa yaşlarnı körip pek sevinem. İşte bu bizim epimizni birleştirdi”, – dedi öz çıqışında Milliy Meclis reisi Refat Çubarov.

“Niayet, uquq, serbestlik, biri-biriniñ qadirini bilgenler arasında, Avropa ailesinde bulunmaq istegimiz bizni birleştirdi. Sabır etiñiz, bugün olmasa, eminim ki, elbetteki yarın – biz anda olurmız”, – dep qayd etti Qırımtatar halqı Meclisiniñ reisi.

Ukrain devletiniñ Avropa integratsiyası yonulişine qoltutmaq kerekligini Meclis Kâtibiyetiniñ başı Dilâver Akiyev de öz çıqışında bildirdi.