2013 senesi noyabr 28 künü Aqmescit regional meclisniñ kenişletilgen toplaşuvı olıp keçti

28 Noyabr 2013

Lemmar Yunusovnıñ reisliginde keçirilgen bu toplaşuvnıñ işinde Aqmescit rayonı yerli meclislerniñ reisleri ve azaları, bunıñ kibi de Qırım musulmanlarınıñ müftisi acı Emirali Ablayev, Meclis reisi Refat Çubarov, onıñ muavinleri Zaur Smirnov, Nariman Celâl ve Ayder Acimambetov, VI çağırılış Qurultayı Teftiş komissiyasınıñ reisi Ali Özenbaş, Meclis azaları Gayana Yüksel ve Dinara Seytgaziyeva iştirak etip, Halqara insan aqları kününe bağışlanğan mitingge azırlıq ve Mamut Sultan vadiysindeki vaziyetni muzakere ettiler.

Meclis reisiniñ muavini, Meclisniñ milliy idare organları, QMC devlet icra akimiyeti, yerli idare organları, epsi seviyelerdeki şuralarnıñ deputatlarınen çalışuv idaresiniñ başı Zaur Smirnov Aqmescit rayonı yerli meclislerniñ reisleri ve azalarına muracaat etip, olacaq tedbir aqqında semetdeşlerni olduqça haberdar etmekni teminlev ricasında bulundı.

“Biz epimiz aktiv olıp, Halqara insan aqları kününe bağışlanğan mitingge çoqça semetdeşlerimizni celp etmelimiz, – dedi Zaur Smirnov. – Bunıñ kibi de o, mitingni keçirüv boyunca Teşkiliy komitet azalarına tedbir keçirilgen vaqıtta cemaat tertip-nizamınıñ teminlenilmesine diqqatnen yanaşmalarını rica etti.

Kün terbinini nevbetteki mesele Aqmescit rayonı Mamut Sultan vadiysinde yerli akimiyet cami qurucılığına ayırğan toprağını kendisi bazar ve yarmalıq içün bermek qararını alğan soñ qopqan dava aqibetinde meydanğa kelgen vaziyet muzakeresine bağışlandı.

Belli ki, vadiyniñ “Büki” massivi rayonında 0,2 gektarlıq yerni Qırım Müftiligi cami qurucılığı içün sorağan ve evel şu yerniñ köy şurası bu topraqnı ayırğan edi.

Yerli meclis azaları ve yerli sakinler çıqışta bulunaraq yerli akimiyet tarafından yapılğan areketler davağa alıp kelgenini qayd ettiler. “Biz ibadethaneler, camiler qurucılığı aqqında aytamız, akimiyet ise öz iqtisadiy maqsadlarını qorçalap, bizge qulaq asmay, – dediler yerli sakinler.

Öz nevbetinde Meclis reisiniñ muavini Zaur Smirnov ve Aqmescit regional meclis reisi Lemmar Yunusov toplaşuv iştirakçilerini Qırım Musulmanlarınıñ müftisi, Mamut-Sultan köy şurası, Cumhuriyet Milletler komiteti, Cumhuriyet topraq komiteti ve Aqmescit devlet rayon memuriyeti reisiniñ muavini arasında söyleşüvlerniñ neticesi olğan protokol leyhasınen tanış etti.

Bu vesiqa leyhasına köre taraflar Qırım musulmanları diniy idaresine Büki, Şumhay (Zareçnoye) ve Eski Orda (Lozovoye) massivlerinde Mamut Sultan vadiysiniñ merkeziy cami, Bükide maalle cami qurmaq, Büki massivinde qoyulğan temel taşınıñ yerine hatıra taşını qoymaq ve Eski Ordada Yaltinskaya soqağında evelki musulman mezarlığı yerinde bağça yapmaqnı qararlaştırdılar.

Meclis reisi Refat Çubarovnıñ aytqanına köre, cami qurucılığına dair meselelerniñ çeziminde printsipler saqlanır ve musulmanlarnıñ ibadethanelerin mıtlaqa qurulır. Bunıñ kibi de o, menfaatdar taraflarğa pıtraqlı meselelerni çezüv usulı ve taktikasını deñiştirmekni tevsiye etti.

“Men eminim ki, soñki qararnı Qırım musulmanlarınıñ müftisi almaq kerek, – dep devam etti Çubarov. – Meclis, yerli ve regional meclislerniñ vazifesi ise taraflarnıñ menfaatlarına cevap bergen qararnı almağa semereli qoltutmaqtır”.