Ukraina halq deputatı Mustafa Cemilev ve Meclis azaları «Şarq ortaqlığı» sammitinde iştirak etmek içün Vilnüske yol aldılar

27 Noyabr 2013

Noyabr 27-29 künleri belli sovet uquqqoruyıcısı, Ukraina halq deputatı Mustafa Cemilev Litva Seyminiñ resmiy davetine köre “Şarq ortaqlığı” sammiti çerçivesindeki “Demokratiya parlament forumı” sammitinde iştirak etmek içün resmiy ziyaretnen Vilnüske ketti.

Mezkür tedbirde Avropa Birligi azaları olğan devletlerniñ tış işleri komitetleriniñ reisleri iştirak etecekler. “Demokratiya parlament forumı” sammiti işi devamında Mustafa Cemilevge qırımtatarlar meselesi boyunca çıqış yapmaq imkânı berilecek.

Mustafa Cemilevge resmiy ziyarette Meclis reisiniñ muavini, tışqı iqtisadiy alâqalar, yatırım ve milliy iqtisadiyat inkişafı idaresiniñ başı Aslan Ömer Qırımlı ve tış alâqalar idaresiniñ başı Ali Hamzin refaqatlıq yapalar.

Hatırlatamız ki, noyabr 28-29 künleri Vilnüste Ukraina ve Avropa Birligi arasında birleşme aqqında añlaşma imzalanması beklenile edi.