Meclis reisi Refat Çubarov: «Er angi yarış balalarnıñ öz medeniyetini ögrenmek, öz yurtu, öz halqınıñ vatanperveri olmasına siltemdir»

26 Noyabr 2013

Qarasuvbazarda noyabr 26-da Bekir Çoban zade doğğanınıñ 120 yıllığına bağışlanğan yarışnıñ üç nominatsiyada: “Bekir Çoban zade eserlerini bediiy oquv”, “Bekir Çoban zade eserleri mevzusına eñ yahşı resim” ve “Qırımtatar edebiyatı ocalarınıñ mültimedia taqdimi” neticelerine yekün çeküv merasimi ötkerildi.

İcadiy tedbirde Meclis reisi Refat Çubarov, Meclisniñ qırımtatar tilinde tasil ve qırımtatar tilini Qırımnıñ devlet ve cemaat ömüriniñ bütün saalarına tadbiq etüv meseleleri boyunca idareniñ başı Emine Avamileva, Bekir Çoban zade fondınıñ direktorı, Qurultay delegatı Remzi Velilâyev, şeerniñ yolbaşçısı Albert Kangiyev, Qarasuvbazar rayon devlet memuriyeti başınıñ muavini Nikolay Stegaçöv ve şeer sakinleri iştirak ettiler.

“Er angi yarış balalarnıñ öz medeniyetini ögrenmek, öz yurtu, öz halqınıñ vatanperveri olmasına siltemdir”, – dep başladı öz çıqışını Refat Çubarov. Meclis reisi tedbir teşkilâtçılarına, öz talebelerini bu yarışqa azırlağan ocalarğa teşekkür bildirip, yarışta muvafaqiyetler tiledi.

Böyle yarışlar parlaq ve istidatlı balalarnı tapmağa yardım etkenini qayd etken Refat Çubarov: “Ümüt etem ki, bunıñ kibi yarışlar er yerde keçirilip, halqımıznıñ kelecegini belgileycek yañı nesilni şekillendirirler”, dedi.

Emine Avamileva, öz nevbetinde şunı qayd etti ki, Qarasubazarda endi çoq yıllardan berli pek yüksek bir seviyede adı şu şeer ile bağlı olğan Bekir Çoban zadeniñ hatırasına bağışlanğan tedbirler keçirilmekte. “İlk-evelâ men balalarına tarihımıznı añlatqan ve vatanperverlik duyğusını aşlağan ana-babalarğa büyükten-büyük teşekürimni bildirmek isteyim, – dedi Meclisniñ qırımtatar tilinde tasil ve qırımtatar tilini Qırımnıñ devlet ve cemaat ömüriniñ bütün saalarına tadbiq etüv meseleleri boyunca idareniñ başı Emine Avamileva

Yarışta iştirak etken balalar üç kategoriyağa – 1-4 sınıf talebeleri, 5-8 sınıf talebeleri ve 9-11 sınıf talebelerine bölünip, Bekir Çoban zadeniñ şiirlerini qırımtatar ve rus tillerinde oqudılar. Yarıştaki çıqışlardan soñ jüri eyyeti ğaliplerni belgiledi. Olarğa diplom ve qıymetli bahşışlar berildi.

Milliy Meclis adından Refat Çubarov tedbir teşkilâtçılarına ve evel yarışta ğalip çıqqanlarnı fahriy yarlıqlarnen taqdirledi. Yarlıqlar Çoban zade adına kütüphane müdiri Zeyneb Cemileva, rayon müzeyiniñ direktorı Marlena Kelâmova, şeer tasil bölügi usulcısı Vade Ametova, qırımtatar tili ocası Gülnar Kaçkayeva ve 10-ncı sınıf talebesi Feride Fakidova ve 11 klass talabesi Mavile Bahşışevağa berildi.

Malümat içün: yıl devamında yarış ve yarış neticelerine yekün çeküv merasimi Bekir Çoban zade fondı ve onıñ qurucısı Resul Velilâyevniñ yardımı sayesinde keçirildi