Abduraman Egiz: Avropa yönelişi Ukraina tış siyasetiniñ qanunında pekitilgen yöneliştir

24 Noyabr 2013

Noyabr 24 künü Ukrainanıñ bir çoq şeerlerinde, bunıñ kibi de Aqmescitte “Avropa Ukrainası içün” şiarı altında halq narazılığı aktsiyaları keçirildi. Ukraina vatandaşları şeerlerniñ merkeziy meydanlarına çıqıp ükümetniñ Ukraina ve Avropa Birligi arasında birleşme imzalanmasını toqtatmaq aqqındaki qararına qarşı olğanlarını numayış ettiler.

Ukrainadaki narazılıq aktsiyalarına dünyanıñ ukrain diasporası yaşağan onlarnen devletlerde qoltutalar. 

Aqmesdcitte Qırım ükümeti binasınıñ qarşısında 1000-den ziyade adam toplaşıp, soñra Ukraina Prezidentiniñ Qırımdaki daimiy temsilciligi binasına taba yol aldılar. 

Çoqmilletli Qırımnıñ sakinleri olğan narazılıq aktsiya iştirakçileri şeerlerniñ merkeziy meydanlarında narazılıq numayışlarına çıqmaq – bu, Ukraina vatandaşları qarar alğanları ve bu qararğa munasip olğanlarını kendileri ve dünyağa köstermekniñ usulı, dep sayalar. “Ukrainanıñ Avropa Birligi ile añlaşmağa qoltutuv aktsiyasına qoşulmaq epimiz içün ahlâqiy bir adımdır”, deyler narazılar.

 “Ukraina halqara meydanda mesül bir ortaq olmalı”, – dedi öz çıqışında Aqmescitte Meclis azası Abduraman Egiz. – Tış siyasetimiz açıq olmalı, Avropa yönelişi Ukraina tış siyasetiniñ qanunında pekitilgen yöneliştir” 

Şunı da qayd etmeli ki, 2013 senesi noyabr 19 künü Meclis azaları Avropa Birliginiñ azası olğan devletlerniñ ükümetlerine, Ukraina Prezidenti ve Yuqarı Şurası adına “Ukraina ve Avropa Birligi ile birleşme aqqında Añlaşma aqqında” beyanatnı birağızdan qabul etip, Vilnüs sammiti Ukraina ve Avropa Birligi arasında birleşme aqqındaki añlaşma imzalanmasınen yekünlenmesi içün zarur er şeyni yapmağa çağırdılar

“Qırımtatar halqınıñ Meclisi Ukraina ve Avropa Birligi arasında birleşme aqqında temel muqaveleniñ imzalanması Ukraina ve Avropa Birligi arasında munasebetlerniñ yañı şekiline esas olur, Ukrainada Avropa Birligi qaideleri ve standartlarına uyğun şekilde sistem uquqiy islâat ve deñişmelerge yol açar”, – denile mezkür beyanatta.