Valeriy Patskan: Küreşsiz ğalebe olmaz

21 Noyabr 2013

Ukraina Yuqarı Şurasınıñ İnsan, milliy azlıqlar ve milletlerara munasebetler meseleleri boyunca komitet reisi, Ukraina halq deputatı Valeriy Patskan Qırımtatar halqı Meclisiniñ yañı reisi Refat Çubarov ve Meclisniñ yañı erkânını saylanğanları munasebetinen hayırladı.

“Cenap reisni böyle şerefli, lâkin mürekkep bir vazife ile hayırlayım”, – dedi Valeriy Patskan. – “Men Yuqarı Şuranıñ milliy azlıqlar ve milletlerara munasebetlerni qorçalağan komitetniñ başı olğanımnı bilesiñiz.

Men qırımtatar halqını pek ürmet etem, amma bizim devletimizdeki şimdiki akimiyetke taba sizler ile beraberlikte yapmağa tırıştığımız adımlar sezilirli bir netice bermediler.

Men bilem ki, yedinci çağırılış Yuqarı Şurada bir sıra avaleler mevcut ki, angileri qırımtatar halqına medeniy, iqtisadiy seviyelerini kötermek imkânını berir ve umumen qırımtatar halqına ta qadim devirlerden berli ait olğan topraqta ükümranlıq etmek imkânını berir.

Bilem, pek ağır, amma sizge kimse yengil olur, dep vade etmedi ki. Sizge şunı aytmaq isteyim ki, küreşsiz ğalebe olmaz”. Bunıñ kibi de o, “qırımtatar halqınen bağlı bütün meselelerniñ qısqa müddet içinde çezilmesi içün komitet bütün küç-ğayretini işke qoyar”, dep işandırdı.
 

Hatırlatamız ki, 2013 senesi noyabr 21 künü Kiyevde Meclis yolbaşçılarınıñ diplomatik missiyalar ve Ukrainada akkreditatsiya etilgen halqara teşkilât yolbaşçıları ile eryıllıq 3-nci körüşüvi olıp keçti.

Körüşüvde çet devlet elçilikleri, BMT, Avropa Birligi kibi halqara teşkilâtlar, Migratsiya boyunca halqara teşkilâtnıñ Ukrainadaki temsilciligi, BMT aliy komissarı idaresiniñ Beyazrusiye, Moldova ve Ukraina boyunca temsilciliginiñ 30-dan ziyade vekilleri,

Körüşüvniñ resmiy teşkilâtçısı “Qırım inkişafı fondı” hayriye teşkilâtı, ortağı ise “Qırım halqara biznes birleşmesi” oldılar.