Eynulla Madatli: Tamır sakinler öz tuvğan toprağınıñ qaytarılmasını talap etkenleri tabiiydir

21 Noyabr 2013

Azerbaycan Cumhuriyetiniñ Ukrainadaki Vefqulade ve toluvekâletli elçisi Eynulla Madatli qırımtatarlarnıñ öz Vatanı Qırımda inkişaf etmek ve ilerilemek istegine qoltuttı.

“Qırımtatar halqınıñ Meclisini hayırlap, qırımtatar halqınıñ inkişafı ve ilerilemesi oğrundaki bütün planlarıñız amelge keçmesini tileyim. Şübesiz, Qırım Muhtar Cumhuriyeti Ukrainanıñ ayırılmaz parçasıdır ve tek o Qırımnıñ inkişafını teminleyebilir. Qırımda yaşağan cemi halqlar yahşı yaşayışqa munasiptirler, dep sayam, çünki olar sovet rejiminden er kesten ziyade zarar kördiler. Biz epimiz – çeçenler, başqırtlır, afğanlar ve qırımtatarlar, Qırımdaki diger millet vekilleri de azap çektik”, – dedi cenap elçi.

“Tamır sakinler ecdatları qoyğan temelni pekitmege devam ettirmeleri içün öz tuvğan toprağınıñ qaytarılmasını talap etkenleri tabiiydir. Zanımca, diplomatik missiyalarnıñ vekillerinen körüşüv pek faydalıdır ve regional akimlernen dialog, yahşı bağ ve muzakereniñ sezilirli yardımı olur”, – dep qayd etti Eynulla Madatli. – “Men defalarca Qırımda oldım ve Qırım yolbaşçılarınen körüşip, akimler tüşüngeni, bir şeyler yapqanınıñ şaatı oldım. Tabiiy ki, bu işlerge merkeziy akimiyet de qoltutması lâzimdir. Men epiñizge – qırımtatar halqına da, Qırımda yaşağan diger millet mensüplerine de muvafaqiyet tileyim”

Hatırlatamız ki, 2013 senesi noyabr 21 künü Kiyevde Meclis yolbaşçılarınıñ diplomatik missiyalar ve Ukrainada akkreditatsiya etilgen halqara teşkilât yolbaşçıları ile eryıllıq 3-nci körüşüvi olıp keçti.

Körüşüvde çet devlet elçilikleri, BMT, Avropa Birligi kibi halqara teşkilâtlar, Migratsiya boyunca halqara teşkilâtnıñ Ukrainadaki temsilciligi, BMT aliy komissarı idaresiniñ Beyazrusiye, Moldova ve Ukraina boyunca temsilciliginiñ 30-dan ziyade vekilleri,

Körüşüvniñ resmiy teşkilâtçısı “Qırım inkişafı fondı” hayriye teşkilâtı, ortağı ise “Qırım Halqara Biznes Birleşmesi” oldılar.