Meclis reisiniñ muavini Aslan Ömer Qırımlı emin ki, qırımtatarlarnıñ milliy iqtisadiyatını ileriletmek kerek

21 Noyabr 2013

“Meclisniñ yañı şekillendirilgen erkânında maña yañı “Tışqı iqtisadiy alâqalar, yatırım ve milliy iqtisadiyat inkişafınıñ idaresi”ni meydanğa ketirmek ve yolbaşçılıq yapmaq avale etildi, – dedi Meclis reisiniñ muavini Aslan Ömer Qırımlı Meclisniñ Ukrainada akkreditatsiya etilgen diplomatik missiyalar ve halqara teşkilât vekillerinen olıp keçken er yıllıq 3-nci körüşüvinde yapqan çıqışında.

Bunıñ kibi de o, evel Meclisniñ böyle idaresi olmağanı ve bu yönelişte faaliyet köstermegenini qayd etti.

Aslan Ömer Qırımlı emin ki, qırımtatar halqınıñ inkişafı ille iqtisadiy meseleler, tedbikârlıq ve milliy iqtisadiyatnıñ ilerilemesine ziyade diqqat ayırmaq kerek. “Biz Ukraina devletiniñ bir qısmı olaraq halqımıznıñ menfaatlarına uyğun şekilde inkişaf etmek ister edik, – qayd etti Qırımlı. Bunıñ içün onıñ fikrince qırımtatar halqınıñ iqtisadiy ihtiyacları meselesini etraflıca ögrenmek, cemiyet, Qırım ve Ukraina akimiyetine Qırım ealisiniñ eyiligi oğrunda birlikteki işniñ semereli planını azırlamaq ve teklif etmek kerek.

“Bizim iş adamlarımız ve biznesmenler İslâm dünyası, türk ve arap memleketlerinen sıqı bağlıdırlar, -devam etti Meclis reisiniñ muavini. – Bu fakt em yatırımlarnı celp etmek noqtai nazarından, em de ukrain malları ve hızmetlerini yañı bazarğa çıqarmaq tarafından da meraqlıdır”.

Diplomatik korpus ve Ukrainada akkreditatsiya etilgen halqara teşkilât vekillerine hıtap eterek Meclis reisiniñ muavini, Tışqı iqtisadiy alâqalar, yatırım ve milliy iqtisadiyat inkişafı idaresiniñ başı Aslan Ömer Qırımlı eki taraflama elverişli işbirlik teklifi, bağlarnıñ daa ziyade inkişaf etmesi ve qaviyleşmesine siltem olacaq konsultatsion ve teşkilâtiy körüşüv keçirmek teklifinen çıqışta bulundı.

Hatırlatamız ki, noyabr 21 künü Kiyevde Milliy Meclis yolbaşçılarınıñ Ukrainada akkreditatsiya etilgen diplomatik missiyalar ve halqara teşkilât vekillerinen olıp keçken er yıllıq 3-nci körüşüvi olıp keçti.

Körüşüvde çet devlet elçilikleri, BMT, Avropa Birligi kibi halqara teşkilâtlar, Migratsiya boyunca halqara teşkilâtnıñ Ukrainadaki temsilciligi, BMT aliy komissarı idaresiniñ Beyazrusiye, Moldova ve Ukraina boyunca temsilciliginiñ 30-dan ziyade vekilleri, Milliy Meclisniñ bütün azaları ve Meclisniñ yañı saylanğan reisi Refat Çubarov iştirak ettiler.

Körüşüvniñ resmiy teşkilâtçısı “Qırım inkişafı fondı” hayriye teşkilâtı, ortağı ise “Qırım halqara biznes birleşmesi” oldılar.