Meclis reisiniñ muavini Zaur Smirnov Ay-Petr platosında keçirilgen toplaşuvda iştirak etti

19 Noyabr 2013

2013 senesi noyabr 19 künü Meclis reisiniñ muavini  Zaur Smirnov  Yalta şeer şurasınıñ başı Sergey İlaşnıñ daveti ile Ay-Petr  platosında keçirilgen seyyar iş toplaşuvında iştirak etti. Toplaşuvda  Yalta şeeri başınıñ yardımcısı İvan Zabruskov, Yaltanıñ baş mimarı  Vladimir Pristupa ve Ay-Petri platosında ticariy faaliyet köstergen iş adamları da bulundılar.  Zaur Smirnovnıñ söylegenine köre  Ay-Petri iş adamlarınıñ ekseriyeti qırımtatarlarıdır.Körüşüv devamında  2013 senesi kurort mevsiminiñ neticelerine yekün çekilip, bu yerniñ inkişafına dair problemlerni  ve olarnı  Qırım akimiyetinen birlikte çezüvnen bağlı  meseleler muzakere etildi.  Toplaşuv qatılımcıları  2014 kurort mevisimine azırlıq planını da belgilediler. Meclis reisiniñ muavini  Zaur Smirnov bunıñ kibi de şunı qayd etti ki, seslendirilgen meseleler bir ay içinde işlenecek ve ondan soñ aynı şu erkânda nevbetteki toplaşuv keçirilmesi planlaştırıla.