2013 senesi noyabr 15- 17 künleri Milliy Meclis reisi Refat Çubarov iş ziyaretinen Türkiyede bulundı

18 Noyabr 2013

2013 senesi noyabr 15- 17 künleri Milliy Meclis reisi Refat Çubarov iş ziyaretinen Türkiyeniñ Eskişehir şeerinde bulundı.

Qırım delegatsiyasına Ukraina halq deputatı Mustafa Cemilev, Meclis azaları İlmi Ümerov, Gayana Yüksel, Ahtem Çiygoz, Qırım musulmanlarınıñ Müftisi hacı Emirali Ablayev, ATR telekanalınıñ saibi Lenur İslâmov ve kanal hadimleri, QHA baş koordinatorı İsmet Yüksel kirdiler.

Noyabr 16-da künniñ birinci yarısında Meclis reisi Refat Çubarov, Ukraina halq deputatı Mustafa Cemilev ve Qırım delegatsiyasınıñ azalarını Eskişehir valisi Güngör Azim Tuna ve Eskişehir belediye başı Yılmaz Büyükerşen qabul ettiler. Körüşüvlerde Eskişehir qırımtatar derneginiñ başı Mesut Or ve Qırım dernekleri umumiy merkezniñ İstanbul bölüginiñ başı Celâl İçten de bulundılar.

Körüşüvde Qırımdaki vaziyet boyunca fikir paylaşılıp, neticede Qırımda qırımtatar tilinde oqutılğan umumtasil mektepleri ve Eskişehir oqulları arasında işbirlik aqqında protokol imzalandı.

Muqaveleni Eskişehir valisi Güngör Azim Tuna, Qırımtatar halqı Meclisiniñ reisi Refat Çubarov, qırımtatar halqınıñ lideri Mustafa Cemilev, Türkiye tasil naziriniñ muavini Orhan Erdem imzaladılar. Protokol imzalav merasiminde Ukrainanıñ Türkiyedeki baş konsulı Denis Zolotaröv da bulundı.

Meclis reisi R.Çubarov bildirgenine köre, muqavelege binaen 13 qırımtatar mektebi Türkiyede qardaş oqullarını buldılar. İşte, Bağçasaraydaki 5-nci mektep Anadolu Fatih litseyi, 2-nci mektep Anadolu Salih Zeki litseyinen, Aqmescitteki 5-nci umumtasil mektep ise Eskişehir Anadolu litseyinen işbirlik quracaq. “Kelecekte işbirlik devamında oca ve talebelernen almaşuv, birlikte leyha ve tedbirler keçirilmesi közde tutula”, – dedi R.Çubarov.

Noyabr 16 künü aqşam “Haytarma” birinci qırımtatar bediiy filmi kösterildi. “Haytarma” filmini numayış etmek teşebbüsinen Eskişehir qırımtatar derneginiñ reisi Mesut Or çıqtı.

Tedbirni Eskişehir 2013 Türk Dünyası Kültür Başkenti Ajansı teşkilâtlandırdı.

Foto: “QHA”