Baş saifeHaberlerMeclis reisi Refat Çubarov Abduraim Demirayaqnıñ şahsiy numizmatik kollektsionını Bağçasaray qoruğına bağışlav merasiminde iştirak etti

Meclis reisi Refat Çubarov Abduraim Demirayaqnıñ şahsiy numizmatik kollektsionını Bağçasaray qoruğına bağışlav merasiminde iştirak etti

18 Noyabr 2013

Meclis reisi Refat Çubarov Abduraim Demirayaqnıñ şahsiy numizmatik kollektsionını Bağçasaray qoruğına bağışlav merasiminde iştirak etti

2013 senesi noyabr 18 künü Bağçasarayda Hansarayda Abduraim Demirayaq şahsiy numizmatik kollektsionını Bağçasaray qoruğına bağışlav merasimi olıp keçti.

Numizmat, arheolog ve hayırsever Abduraim Demirayaq 60 yıl devamında toplağan qıymeti ölçüsiz paralar kollektsionını Bağçasaray qoruğına ediye etti. Demirayaqnıñ aytqanına köre kollektsionğa 137 kapik kire, olarnıñ arasında Qırım hanlığınıñ unikal kapikleri, bunıñ kibi de diger qadimiy devletler, cümleden Qıtaynıñ Min sülâlesiniñ tek Britaniya müzeyinde bulunğan kapikleri de bar.

Kollektsionnıñ İndstan qısmı unikal ve dünyada eq ufaq altın kapikler, bunıñ kibi de Ulu Moğollar devrine ait kapiklerden ibarettir. Kollektsioncı qoruqqa öz kollektsionınıñ ğururı olğan 2400 yıllıq fars tunç kapigini de berdi. Kapik üzerinde padişa Dariy elinde mizraq ile tasvirlengen.

Tantanalı merasimde Milliy Meclis reisi Refat Çubarov, Bağçasaray rayon devlet memuriyetiniñ başı, Meclis azası İlmiy Ümerov, Bağçasaray tarihiy-medeniy qoruqnıñ baş direktorı Valeriy Naumenko, QMPU rektorı Fevzi Yaqubov, Bağçasaray rayon şurasınıñ reisi Valentina Kraşkina, Qırım Medeniyet nazirligi vekilleri ve Bağçasaray qoruğınıñ hadimleri, cemaatçılıq iştirak ettiler.

Hatırlatamız ki, 1997 senesi Bağçasaray müzeyiniñ 80 yıllığına Abduraim Demirayaq qoruqqa 195 nesne: Qırım hanlığı, Altın Orda devrine ait kapikler kollektsionı ve avropa medallerini bahşış etken edi.