Büyük Özenbaş köyüniñ musulman cemiyeti tarihiy camini tamir etmek niyetinde

15 Noyabr 2013

Büyük Özenbaş köyüniñ musulman cemiyeti arhiv malümatlarına köre 300 yıllıq tarihı olğan caminiñ rekonstruktsiyasını keçirmek niyetinde.

Bu aqta Meclis reisiniñ muavini Ayder Acimambetov Qırım musulmanlarınıñ müftisi acı Emirali Ablayev ile birlikte Büyük Özenbaş köyüne iş ziyareti neticelerinden soñ bildirdi.

Cami tamiri meseleleri köy musulman cemiyeti azalarınen körüşüvde muzakere etildi. Acimambetov Qırım musulmanlarınıñ müftisi acı Emirali Ablayev qırımtatar mimarlığınıñ yadikârlığı olğan tarihiy caminiñ ğayrıdan tiklenilmesinde köy musulmanlarına yardım etmek içün sermiya qıdırmaq kerekligini qayd etti.

Büyük Özenbaş köyüniñ musulman cemiyeti öz nevbetinde Müftiy ve Meclis reisiniñ muavinine ziyaretleri içün teşekkür bildirip, eñ yaqın zamanda cami kene evelki sıfatını tikleycegine ümüt etkenlerini ayttılar.
 

Foto: Qırım musulmanları diniy idaresiniñ matbuat hızmeti