Meclis reisi Refat Çubarov Latviya mustaqilliginiñ 95 yıllığına bağışlanğan fotosergini ziyaret etti

13 Noyabr 2013

2013 senesi noyabr 13 künü Tavrida Merkeziy müzeyinde Latviyanıñ Ukrainadaki Vefqulade ve Toluvekâletli Elçisi Argita Daudze “Mustaqillikke yolumız” fotosergini açtı.

Fotosergi Latviya Cumhuriyeti Tış işler nazirligi tarafından fotografçı İlmars Znotınış ile birlikte azırlanıp, Latviya mustaqilligi ilân etilgeniniñ 95 yıllığına bağışlandı.

Serginiñ tantanalı açılışında Qırımtatar halqı Meclisiniñ reisi Refat Çubarov, Qırım Yuqarı Şurasınıñ reisi Vladimir Konstantinov, Ukraina Prezidentiniñ Qırımdaki daimiy temsilcisi Viktor Plakida, Qırım milletlerara munasebetler ve sürgün etilgen grajdanlarnıñ işleri boyunca cumhuriyet komitetiniñ reisi Refat Kenjaliyev, Tavrida Merkeziy müzeyiniñ baş direktorı Andrey Malgin iştirak ettiler.

Resmiy qısımnı Andrey Malgin açıp, latış halqı içün müim ve emiyetli vaqita ile er kesni hayırladı. Latviyanıñ Ukrainadaki Vefqulade ve Toluvekâletli Elçisi Argita Daudze latış halqınıñ öz mustaqilligi içün küreşiniñ tarihını qısqadan tarif etip, Qırımnıñ resmiy akimiyeti ve cemaatçılıqqa sergige diqqat ayırğanları içün teşekkür bildirdi.

“Men sergini teşkil etüvde yardımcı olğanlarnıñ episine, şahsen sizge, cenap Malgin, Tış işler nazirligi, Qırım akimlerine minnetlarlığımnı bildirmek isteyim. Aramızda em Aqmescit, em de başqa şeerlerden kelgen insanlarnı körmekten pek memnünim. Tabiiy ki,qırımtatar halqını temsil etken ve Latviyada o devirdeki vaqialarnıñ şaatı olğan cenap Refat Çubarovnı da mında körgenime pek sevindim”, – dep qayd etti Elçi.

“Latış tilinde ğayet mündericeli bir söz bar – “Atmoda”. Bu “uyanuv” demektir – dep başladı öz çıqışını Meclis reisi Refat Çubarov. – Mustaqilligi yolunda latış halqı pek çoq qıyınlıqlarğa rastkeldi, lâkin iç bir zaman serbestlik ruhu ve devletçiligini qurmağa tırışuv istegini coymadı”.

Refat Çubarov ömüriniñ Latviya ve latış halqınen bağlı qısmı üçünci, neticesinde Latviya öz mustaqilligini elde ettigi, Atmoda devrine doğru kelgeninden bahtlı olğanını qayd etti.

“Menim latış qardaşlarımnıñ yanında bulunmaq ve çarem olğanı qadar Latviya mustaqilliginiñ ğayrıdan tiklenmesine yardım etmek şerefine nail oldım”, – dedi Refat Çubarov.

Öz çıqışını o, XIX asırnıñ soñu ve ХХ asırnıñ başında yaşağan, angileriniñ ki vasiyetleri bugün de pek aktual olğan eki ulu insan Yanis Raynis ve İsmail Gasprinskiyniñ sözlerinen yekünledi.

“Biri-birimizge qarşı degil, beraberlikte zulmetke qarşı” (“Ne viens pret otru , bet kopā – pret tumsu!”) – dep vasiyet etti bizge ulu Yanis Raynis!

“Tilde, fikirde,işte birlik” tekrarlaymız biz Qırım toprağınıñ şanlı evlâdı İsmail Gasprinskiyniñ ögütini.

Serginiñ açılış merasiminden soñ Latviyanıñ Ukrainadaki Vefqulade ve Toluvekâletli Elçisi Argita Daudze tedbir iştirakçilerini fotostendlerde yerleştirilgen er bir foto ile şahsen tanış etti.