Qırımtatar halqınıñ lideri Mustafa CEMİLEV 70 yaşını toldurdı

13 Noyabr 2013

Bugün, 2013 senesi noyabr 13 künü SSSRde insan aqlarını qorçalav teşebbüsçi gruppasınıñ esasçılarından ve azalarından biri, sovet kamplarınıñ mahbüsi, Birleşken Mlletler Teşkilâtı qaçaqlarnıñ işleri boyunca Aliy komissarnıñ “Nansen mukâfatı”nıñ saibi, Qırımtatar halqı Meclisiniñ 1991-2013 senelerde Reisi, Ukraina halq deputatı Mustafa CEMİLEV 70 yaşını toldurdı. 

Meclis azaları Mustafa CEMİLEVge qaviy sağlıq, tükenmez küç-ğayret ve aileviy baht tileyler.

“Öz cesareti, ikmeti ve cesürliginen Mustafa Cemilev qırımtatarlarnı ve daa çoqtan-çoq mazlum halqlarnı tarihiy adaletsizlikke qarşı küreşke ilhamlandırdı. Onıñ itibarı ve insan aqları ve serbestligi, milliy degerligini qorçalavdaki tecribesi qırımtatar halqı aqlarınıñ ğayrıdan tiklev areketiniñ ayırılmaz qısmıdır”, – dep qayd eteler Qırımtatar halqı Meclisiniñ azaları

Yubilârnı hayırlav merasimi “Marakand” kompleksinde saat 15.00-de başlanacaq