Refat Çubarov: Camilerni yaqmaq ve Ukraina halq deputatınıñ arabasına ücüm etmekniñ bir maqsadı bar – fesat çıqarmaq

11 Noyabr 2013

Meclis reisi Refat Çubarov Ukraina halq deputatı Mustafa Cemilevniñ arabasına ücüm etüv ve Qırım camileriniñ yaqılması bir zıncırnıñ alqalarıdır, dep saya. Onıñ fikrince, bu cinayetlikler Qırımda vaziyetni kerginleştirmek maqsadında yapılmaqta. Bu aqta o kütleviy matbuat vastalarına izaatlarında bildirdi.

Refat Çubarovnıñ söylegenine köre, qırımtatarlarına ve musulman degerliklerine qarşı yapılğan iç bir cinayetlikniñ üstü açılmadı.

“Bu cinayetliklerniñ iç birisi açılmadı. Ne sımarışçıları belli, ne de icracıları. Demek, olarnıñ episi bir zıncırnıñ alqalarıdır, diyebilemiz”, – dedi Çubarov.

Bunıñ kibi de o, qayd etti ki, bu cinayetliklerniñ maqsadı cemaat tınçlığını bozmaq, milletler, dinlerara nefret qozğamaqtır.

“Menim fikrimce, camilerni yaqmaq, halq deputatınıñ arabasına ücüm etmek kibi cinayetliklerni bir maqsad bağlay – fesat çıqarmaq”, dedi R. Çubarov.

Çubarov şunı da ilâve etti ki, Cemilevniñ arabasına ücüm etkenler de diger cinayetliklerni yapqanlar kibi tapılmaz”, dedi o. “Bu cinayetlikte qabaatlılarnıñ tapılacağına ümüt etmek çoq zor”, dedi Meclis reisi.

Hatırlatamız ki. Aqmescitte bellisiz şahıslar Ukraina halq deputatı Mustafa Cemilevniñ arabasınıñ penceresini taşnen urıp qırdılar. Adise noyabr 10 gecesi halq deputatınıñ ofisi yerleşken Şmidt soqağı 2-nci binada yüz berdi. Cemilev bu vaqıtta öz kabinetinde eken Aqmescit şeer Kiyev rayon militsiyasınıñ bölügi bu fakt boyunca taqiqat işlerini alıp bara.