Türkiye Tış işleri naziri Ahmet Davutoğlu Refat Çubarovnı Meclis reisi vazifesine saylanğanı ile hayırladı

08 Noyabr 2013

“Sizni 2013 senesi oktâbr 26-27 künlerde olıp keçken Qırımtatar halqı qurultayında olğan saylavlar neticesinde Meclis reisi olaraq seçilgeniñiz ile samimiy hayırlayım”, – dep yaza öz resmiy mektübinde Türkiye Tış işleri naziri Ahmet DAVUTOĞLU.

Öz mektübinde Türkiye Tış işleri naziri Ahmet DAVUTOĞLU şunı da qayd ete ki, qardaş qırımtatar halqı Türkiyeniñ strategik ortağı Ukraina ile hızlı şekilde inkişaf etken munasebetlerinde eki devlet arasındaki dostluq ve emekdaşlıqnı pekitken bir temeldir.

“Bizim eñ büyük istegimiz qardaş qırımtatar halqını öz aqlarına irişken, sotsial ve iqtisadiy saalarda ilerilegen, kendi medeniy özgünligini saqlap qalğan ve qardaş ukrain halqınen yan-yanaşa yaşağan mustaqil Ukrainanıñ tarafdarı olaraq körmektir.

Aynı şu maqsad ile Türkiye Cumhuriyeti Ukraina ükümetiniñ samimiy vn yaratıcı areketlerine qoltutacaq, – dep qayd ete Türkiye Tış işleri naziri.

Türkiye Tış işleri naziri Ahmet DAVUTOĞLU Meclis reisi Refat Çubarovğa yañı vazifede muvafaqiyetler, qardaş qırımtatar halqına ise eyiallılıq tiledi.

“Sizge qırımtatar halqınıñ efsaneviy oğlu Mustafa Cemilevden keçken vazifeni munasip eda etecegiñizge iç şübem yoqtır, – dep yaza Türkiye Tış işleri naziri Ahmet DAVUTOĞLU.

Hayırlavlarğa Türkiyeniñ Odessadaki Baş konsulı Nur SAGMAN da qoşuldı