Niderland ükümeti qırımtatar meselesine diqqat ayırmaqnı devam etmek meramında

08 Noyabr 2013

2013 senesii noyabr 8 künü Milliy Meclis reisi Refat ÇUBAROV Niderlandnıñ Ukrainadaki Elçiliginiñ 1-nci kâtibi Marisiya PEHAÇEK ile körüşti. Körüşüvde bunıñ kibi de Meclisniñ tış alâqalar bölüginiñ başı Ali Hamzin ve Kâtibiyetniñ başı Dilâver Akiyev iştirak ettiler.

Bu, Pehaçek hanımnıñ Niderlandnıñ Ukrainadaki Elçiliginiñ 1-nci kâtibi sıfatında birinci iş ziyaretidir. O, Refat Çubarovnı Meclis reisi vazifesine saylanğanı ile hayırlap, onıñ çoqyıllıq professional tecribesi köz ögüne alınğanı alda işanılğan vazifeni muvafaqiyetli eda etecegine eminlik bildirdi.

“Niderland ükümeti qırımtatarlarnıñ öz Vatanına qaytıp başlağan ilk künlerinden qırımtatarlarnıñ aqları tiklenilmesi ve yerleştirilmesine ayrıca emiyet bergen ükümetlerden biridir”, – dedi Meclis reisi Pehaçek hanım ile subet vaqtında.

Refat Çubarov bunıñ kibi de Pehaçek hanım yüzünde Niderland ükümetine Qırımda amelge keçirilgen bir sıra leyhalar, şu cümleden bugünde-bugün İsmail Gasprinskiy kütüphanesi yerleşken Ruşdiye medresesiniñ rekonstruktsiyası içün minnetdarlıq bildirdi. Meclis başqanı R.Çubarov şunı da qayd etti ki, Meclis yolbaşçıları Niderlandnıñ Ukrainadaki Elçisini Kiyevde noyabr 21-de elçihanelerniñ reberleri ve Ukrainada akkreditatsiya etilgen halqara teşkilât yolbaşçılarınen olacaq er yıllıq üçünci körüşüvde körmekten şeref duyacaqlar.

Taraflar bunıñ kibi Qırımda ağımdaki vaziyetni muzakere etip, qırımtatar halqı problemleriniñ çezilüv ketişatı, ilerideki ortaqlıq meselelerine de toqundılar. Qırımtatarlarnıñ aqlarını tiklev boyunca halqara forum keçirmek istiqbali, Niderland ükümetinen muntazam ve faal işbirlik meselesi ayrıca baqıldı.

Bu munasebetnen Meclis reisi Refat Çubarovğa qırımtatar halqı problemlerniñ çezimi meselesi aqqında Niderland Tış işleri naziri Frans Timmermans ile qonuşmaq teklif etildi. Nazir Kiyevde dekabr 5-6 künleriUkraina reisliginde keçirilecek ÖSСE nazirler sammitinde iştirak etecek. 

“Planlaştırılğan bu sammitniñ kün tertibinde milliy azlıqlarnıñ meselesi mıtlaqa qoyulacaq, – dedi Niderlandnıñ Ukrainadaki Elçiliginiñ 1-nci kâtibi Marisiya PEHAÇEK. – Eminim ki, Niderland Tış işleri naziri, öz vaqtında Avropa işleri naziriniñ muavini olğanda milliy azlıqlarnıñ meselelerinen oğraşqan ve qırımtatar problemine ayrıca diqqat bergen Frans Timmermans ile körüşüvniñ Halqara forum keçirilmesi içün pek faydalı olur”

Bundan da ğayrı Niderlandnıñ Ukrainadaki Elçiliginiñ 1-nci kâtibi Marisiya PEHAÇEKniñ söylegenine köre Niderland ükümeti Qırımdaki vaziyetni diqqatnen közete ve ÖSСE Aliy komissarınıñ ofisinen daimiy dialogda bulunmaqta.

“Biz Knut Vollebek ofisi tarafından azırlanğan “Qırımda, Ukrainada evel sürgün etilgenlerniñ qatıluvı” esabatnı tafsilâtlı ögrenip çıqtıq, – devam etti Pehaçek hanım. – ve 2014 senesi Qırımtatar halqınıñ aqlarını ğayrıdan tiklev boyunca halqara forum keçirilmesi zarurlığını köremiz”.

Körüşüvniñ soñunda taraflar birlikteki emekdaşlıqnı kenişletmekni devam etmege añlaştılar. Niderlandnıñ Ukrainadaki Elçiliginiñ 1-nci kâtibi Marisiya PEHAÇEKniñ aytqanına köre Niderland ükümeti qırımtatar problemine diqqat ayırmaqnı devam etmek meramında. Refat Çubarov bunıñ kibi de Pehaçek hanım yüzünde Niderland ükümetine Qırımda amelge keçirilgen bir sıra leyhalar, şu cümleden bugünde-bugün İsmail Gasprinskiy kütüphanesi yerleşken Ruşdiye medresesiniñ rekonstruktsiyası içün minnetdarlıq bildird.