Meclis reisi Refat Çubarov Qırım Nazirler Şurasınıñ reisi Anatoliy Mogilöv ile körüşti

07 Noyabr 2013

2013 senesi noyabr 7 künü Meclis reisi, Qırım Yuqarı Şurasınıñ deputatı  Refat Çubarov Qırım Nazirler Şurasınıñ reisi Anatoliy Mogilöv ile körüşti.  Körüşüv devamında A. Mogilöv ve R. Çubarov  çezimi birlikte areket etilmesini talap etken bir sıra meselelerni muzakere ettiler.

Mezkür meseleler sırasında Ukraina Devlet bücetiniñ 2014 senesine leyhasınen bağlı teklifler baqıldı. Refat Çubarov Qırım ükümetine Ukraina sotsial siyaset nazirliginiñ 2014 senesi Ukraina devlet bücetine qırımtatarlar ve diger şahıslarnıñ yerleştirilmesine 197 million grivnâ kirsetmek teklifine qoltutmaq teklifini bildirdi.

Belli ki, aynı şu teklifni Ukraina baş nazirniñ adına evel Ukraina halq deputatı Mustafa Cemilev yollağan edi.

Refat Çubarov ve Anatoliy Mogilöv bunıñ kibi de qırımtatarlarnıñ aqlarını tiklev boyunca halqara forumnı qırımtatar halqı sürgünliginiñ 70 yıllığına qadar  keçirüv istiqballerini baqtılar. Nazirler Şurasınıñ başı A. Mogilöv halqara cemaatçılıqnıñ yapabilecek yardımını Qırım inkişafı ve sakinleriniñ eyiallılığı içün qullanmaqnıñ şekillerine dair fikirlerini bildirdi.

Bundan da ğayrı muzakere etilgen meseleler boyunca taraflar öz noqtai-nazarlarını ifade ettiler. Körüşüvniñ soñunda dialognı devam ettirmek aqqında añlaşıldı.