Meclis reisi Refat Çubarov belli qırımtatar yırcısı Gülizar Bekirovanı yubileyi ile hayırladı

04 Noyabr 2013

Belli qırımtatar yırcısı, Qırımda nam qazanğan artist  Gülizar Bekirova sentâbr 26 künü 60 yaşını toldurdı.

Bu munasebet ile qırımtatar sanatınıñ eñ parlaq yıldızlarından biri  yubiley kontsert programmasını azırlap, onı noyabr 4 künü Ukraina akeademik muzıkalı drama teatrinde taqdim eti.  

Salon Gülizar Bekirovanıñ dostları, şegirtleri ve mühlislerinen rıq tolu edi.

Kontsert çerçivesinde Gülizar Bekirovanıñ meslekdeşleri –  Seitabla Memetov, Emine Cevdetova Server Kakura,  Elvira Sarıhalil, Dilâver Bekirov, Lilâfruz Abibullayevanıñ icrasında halq yırları yañğıradı, Bunıñ kibi de halq oyunları icra etildi.

Kontsertke kelgen Meclis reisi Refat Çubarov Qırımtatar halqınıñ Meclisi adından eñ istidatlı yırcılardan biri olğan Gülizar Bekirovanı yubileyi ile hayırlap, bir sepet çeçek bağışladı ve daa çoq-çoq yıllar icat etmesini, qaviy sağlıq tiledi.

Gülizar Bekirova Refat Çubarovğa samimiy sözleri içün teşekkür bildirip, öz nevbetinde onı Milliy Meclis reisi vazifesine saylanğanınen hayırladı.
Sanada  istidatlı yırcını qırımtatar milliy areketiniñ veteranı Ayşe Seytmuratova ve Amerika diasporasınıñ vekili Rustem Borluca hayırladılar.