Refat ÇUBAROVnı Qırımtatar halqı Meclisiniñ reisi olaraq saylanğanı munasebetinen hayırlamaqtalar

04 Noyabr 2013

Cümleden, Meclisniñ yañı saylanğan reisi Refat Çubarovğa öz hayırlavlarını Ukraina halq deputatları, devlet ve cumhuriyet nazirlikleri ve idarelerniñ yolbaşçıları, diniy teşkilât, halqara teşkilâtlarnıñ vekilleri, Ukrainada akkreditatsiya etilgen diplomatlar yollamaqtalar.

Meclis reisine vazifelerini muvafaqiyetli eda etmesini tilegen Avropa Birliginiñ Ukrainadaki vekâletliginiñ başı Yan Tombinski bunıñnen birge Avropa Birligi qırımtatarlarnıñ aqlarını tiklev meselesiniñ çeziminde işbirlikke qoltutmağa azır olğanını işandırdı.

“Eminim ki, siziñ tecribeñiz, printsipial sebatlığıñız ve ikmetiñiz öz aqları içün siyasiy küreş alıp barğan qırımtatar halqınıñ areketlerine, bunıñ kibi de tarihiy adaletni tiklev, Ukrainada munasip ayatnıñ inkişafına siltem olur, – denile Ukraina Yuqarı Şurasınıñ “Batkіvşçina” fraktsiyasınıñ başı Arseniy Yatsenükniñ hayırlavında. – “Batkіvşçina” Bütünukrain birleşmesi Qırımtatar halqınıñ Meclisinen olğan çoqyıllıq ortaqlıq ve dostane munasebetlerge yüksek qıymet kese”.

Arseniy YATsENÜK bunıñ kibi de şunı da qayd etti ki, “Batkіvşçina” Bütünukrain birleşmesi kelecekte de bozulğan aqlarnı tiklev, adalet ve uquqnıñ zaferi, ukrain devletçiligi ve Ukrainadamilletlerara barışıqlıqta demokratik esaslarnıñ tesis etüvde Mecliske qoltutmaqnı devam etecek.

Ukraina medeniyet naziri Leonid Novohatko öz hayırlav telegrammasında Refat Çubarovnıñ itibarı, ikmeti ve cemaat faaliyeti saasındaki çoqyıllıq tecribesi qırımtatarlarnıñ milliy meseleleriniñ çezimine tesir etecegine eminlik bildirdi. “Ukraina Medeniyet nazirligi ve Meclis arasındaki mahsuldar emekdaşlıq ileride de olacağına ümüt eterek, Sizge has ilham, ğayret ömüriñiz ve işiñizde daima yoldaşıñız olmasını tileyim”, – dep yaza Leonid NOVOHATKO.

“Meclis reisi olaraq saylanğanıñıznen hayırlayım ve bu vazifede işiñiz Ukrainanıñ bütün halqına hayır ketirmesini tileyim, – denile Ukraina musulmanları diniy idaresiniñ başı Ahmeda TAMİMniñ mektübinde. – Allahtan qırımtatarlarına barışıq ve eyilik isteymiz”

“Meclis reisi vazifesindeki faaliyetiñiz Cumhuriyet halqlarınıñ mündericeli dialogını teminlemege yardım etip, Qırım ve Ukrainada milletlerara barışıqlıqnı pekitir, – dep yaza öz hayırlavında Ukraina halq deputatı Böris DEYÇ, bunıñ kibi de Meclis reisi Refat Çubarovğa qaviy sağlıq ve Ukraina oğrunda mahsuldar çalışmalarnı tilep.

“Sizni Meclis reisi etip saylağan Qırımtatar halqınıñ Sizge bildirgen büyük işançı ile samimiy tebrik etem, – denile Ukraina halq deputatı Aleksandr FELDMANnıñ hayırlavında. – Sizge qaviy sağlıq, halqnıñ talapları ve insan aqlarını teminlev işinde sizge küç-taqat tileyim”.

Milliy Meclis ve Avropa milliy azlıqlar Federatsion Birlik(FUEN), arasında sıqı dialog ve munasebetlerniñ inkişafını teminlevde işbirlikni devam etmege eminlikni FUEN Prezidentiniñ muavini Halit Habip oğlu bildire.

Meclis reisligine saylanması munasebetinen Refat Çubarovğa hayırlavını “UDAR Vitaliya Kliçko” partiyasından Ukraina halq deputatı Aleksandr Moçkov da yollap, Meclisniñ yañı reisi qırımtatar halqınıñ aqlarını tiklevde, demokratik cemiyetni quruvda, Qırımda yaşağan bütün milletler vekilleriniñ dostane yaşaması oğrunda küç-ğayretini sarf etecegine eminligini ifade etti.

Qırımtatar halqı oğrunda küreşte Refat Çubarovğa mahsuldar çalışmalar ve ilhamnı Poloniyanıñ Aqyar şeehrindeki Baş konsulı Veslav MAZUR, “Umma” Ukraina musulmanları diniy idaresiniñ reisi İslâm GİMADUTİN”Umma” Ukraina musulmanları diniy idaresiniñ müftisi Said İSMAGİLOV, bunıñ kibi de Bağçasaray şeer valisi Konstantin RUBANENKO tilediler.

Şunı da qayd etmeli ki, Refat Çubarovnı Qırımtatar halqı Meclisiniñ reisligine saylanması ile onıñ dünyanıñ çeşit köşelerinde yaşağan çoqtan-çoq dostları, ukrain ve halqara siyaset alanınıñ vekilleri telefon vastasınen ve içtimaiy ağlarda hayırladılar.