Bütündünya tatarlar kongressi, «İdel» Volgaboyu tatarlarınıñ Qırım birleşmesi ve «Tugan tel» merkezi Refat Çubarovnı Meclis reisi vazifesine saylanğanınen hayırladı

04 Noyabr 2013

4 noyabr künü Bütündünya tatarlar kongressi, “İdel” Volgaboyu tatarlarınıñ Qırım birleşmesi ve “Tugan tel” merkeziniñ başı İlmiy Temirgaliyev, “İdel”niñ yaşlar bölüginiñ yolbaşçısı Ayşe Halilova, birleşme azaları Ravil SUNNÜKOV ve Halida KAZAK, bunıñ kibi de “Azatlıq” radiosı tatar-başqırt hızmetiniñ mühbiri, “Yıldız” mecmuasınıñ baş muarriri Dilâver OSMANOV Refat Çubarovnı Meclis reisi vazifesine saylanğanınen hayırlap keldiler.

“Biz Siziñ qırımtatarlar ve çeşit cemaat teşkilâtları arasındaki munasebetlerni pekitüvnen bağlı pozitsiyañızğa qoltutamız, – dedi İlmir Temirgilayev Refat Çubarovnı Meclis reisi vazifesine saylanğanınen hayırlarken. Volgaboyu tatarlar birleşmesiniñ prezidenti emin ki, qırımtatarlar ve qazantatarlarnıñ dostluğı, bunıñ kibi de fikirler birligi bütün qırımlılarnıñ turmuşını eyileştirir.

“İdel” birleşmesiniñ azası Halida KAZAK Bütündünya tatarlar kongressi icra komitetiniñ reisi Rinat ZAKİROVnıñ Refat Çubarov adına yollağan hayırlavını seslendirdi. “Refat Çubarov qırımtatar tili, medeniyetiniñ faal qoruyıcısı olaraq bellidir. Qırımtatar milliy matbuat vastalarınıñ tiklenmesine onıñ ne qadar küç-ğayret sarf etken”, – denile Rinat Zakirovnıñ mektübinde.

Bütündünya tatarlar kongressi icra komitetiniñ reisi Rinat ZAKİROV yañı vazifede Refat Çubarov böyle printsipial ve aktiv olıp qalacağında emin olğanını yaza. “Biz inanamız ki, bizim qardaş halqlarımız sıqı ves amimiy dostane alâqalarını devam eterler”.

Öz nevbetinde Meclis reisi Refat Çubarov hayırlavlar ves amimiy tilekler içün teşekkür bildirip, İsmail Gasprinskiy, Amdi Geraybay, Bekir Çoban-zade ve bunıñ kibi de evelki çağırılış Qurultay ve Meclis erkânları tarafından qoyulğan temelge esaslanğan qırımtatar ve qazantatarlar arasındaki ananeviy bağ ep qaviyleşecegine eminligini bildirdi