2013 cenesi noyabr 2 künü Saqta regional meclisniñ kenişletilgen toplaşuvı keçirildi

04 Noyabr 2013

Toplaşuv işinde Milliy Meclis reisi Refat Çubarov, Meclis azaları Ahtem ÇİYGOZ, Zaur SMİRNOV, Mustafa MAUŞEV, Ayder ACİMAMBETOV ve Dinara SEYTGAZİYEVA, bunıñ kibi de “İnkişaf” cemaat teşkilâtından VI çağırılış Qurultayına seçilgen delegatları, Ukraina halq deputatı Öleg PARASKİV, Saq rayon şurasında “Kurultay-Ruh” fraktsiyasınıñ azaları iştirak ettiler.

Saq regional meclis reisi Eskender Bilâlov oktâbr 26-27 künleri Aqmescitte olıp keçken VI çağırılış Qurultayı 1- nci sessiyasınıñ neticelerini seslendirdi.

Onıñ işandırğanına köre, yerli meclis reisleri, azaları, Qurultay delegatları ve deputatlardan ibaret komandası qoyulğan vazifelerni eda etmege iqtidarlı ve Meclisnen sıqı işbirlikke azır.