Meclis reisi Refat Çubarov: Meclis işiniñ semereligi onıñ uyğun qurumınıñ seçilmesine bağlı

31 Oktâbr 2013

2013 senesi oktâbr 31kunü Aqmescitte Milliy Meclis yañı erkânınıñ ilk toplaşuvı ötkerildi.

Toplaşuvnı açqan Meclis reisi Refat Çubarov Meclis azalarını yañı erkânnıñ çalışıp başlamasınen hayırlap, Meclisniñ bütün faaliyeti qırımtatar halqı menfaatlarınıñ oğrunda olacağına eminlik bildirdi.

Evelden planlaştırılğanı kibi Meclis azaları özleriniñ ilk toplaşuvında Meclis qurumı ve onıñ icra organları boyunca tekliflerni muzakere ettiler. “Biz ne derecede uyğun bir qurum seçebilgenimizge Meclis işiniñ semereligi bağlı olacaq. Şunıñ içün rici etem, er biriñiz Meclis qurumı boyunca teklifleriñizni detallerinen esaslandırıñız. Evelki ve şimdiki çağırılış Qurultay delegatları birinci dereceli, dep tanığan mesele ve yönelişlerge ayrıca diqqat ayırmañıznı da rica etem”, – dedi Meclis reisi Refat Çubarov meslekdeşlerine hıtap eterek.

Toplaşuv devamında mezkür mesele boyunca fikirlernen obyektiv ve faydalı paylaşuv oldı. Meclis qurumı muzakeresinde çıqışta bulunğan Meclis azaları Meclis faaliyetini idare etüv, faaliyetiniñ üstün yönelişlerini belgilev boyunca em Qurultay qararlarına uyğun, em de qırımtatar halqı beklentilerine kelişken konkret tekliflerini ifade ettiler.

Sözge çıqqan Meclis azalarınıñ episi qayd ettiler ki, Meclis qurumı ve onıñ icra organları meselesi Meclis faaliyetiniñ birinci dereceli mesele ve yönelişlerinen bağlanğanı alda muzakere etilmesi Meclis azalarını ait qurum bölüklerine tayinlev, bunıñ kibi de Meclis reisi muavinlerini tasdiqlamaq içün şahıslarnı belgilevde yardım eter.

Böyleliknen, Meclis azalarınıñ alğan qararına köre, Milliy Meclisniñ nevbetteki toplaşuvı noyabr 5 künü keçirilip, onda Meclis qurumı ve onıñ icra organları, Meclis reisiniñ muavinleri ve bölükleriniñ reberlerini tasdiqlamaq planlaştırıla.

Birinci toplaşuvnıñ soñunda Qırım musulmanlarınıñ müftisi acı Emirali Ablayev çıqışta bulundı.

Meclisniñ ilk toplaşuvında 31 azası iştirak etip, ekisi uzurli sebepke köre qatılmadı. Qurultay Teftiş komissiyasınıñ erkânı tolusınen, bunıñ kibi de evelki ve şimdiki çağırılış Qurultaylarınıñ delegatları, qırımtatar cemaat teşkilâtlarınıñ vekilleri iştirak ettiler.

Şunı hatırlatamız ki, noyabr 1 künü Bağçasarayda Meclis reisi ve Meclis yañı azalarınıñ öz vekâletliklerini qabul etüviniñ tantanalı merasimi olıp keçecek. Tedbir Hancamidesaat 11.30-da cuma namazınen başlanacaq.